Airport chungchangah CM thiam lohna hmu lo; Lokayukta-in ACB report an zir mek

Lengpui Airport tihchangtlunnaah dan bawhchhiatna a awm nia ngaia chief minister Zoramthanga hêkna chungchang chhuitu Anti Corruption Bureau (ACB) chuan Chief Minister thiam lohna an hmu lo. Hetih lai hian, Lokayukta chuan ACB report an zir chiang mek.

Lokayukta chuan chief minister Zoramthanga chung­changa complaint an dawn an zir chian hnuah chhui zui tlaka ngaiin ACB an chhuitir a; ACB-in hun eng emaw chen an chhui hnuah report siamin, an report chu Lokayukta hnenah an thehlut tawh a ni.

Vanglaini palai zawhna chhangin Lokayukta chairman C Lalsawta chuan, ACB report an dawn tawh thu sawiin, "ACB report hi uluk taka zir chian mek a ni a, kan zir chian zawh hnuah kalpui zel dan turah thutlukna siam a ni ang," a ti.

Lokayukta Chairman sawi danin, Lengpui Airport tihchang­tlun chungchangah hian ACB chuan CM Zoramthanga thiam lohna an hmu chhuak lo.

Tarlan tawh angin, Mizoram First Movement (MFM) chuan Lengpui Airport tihchangtlunnaah dan bawh­chhiatna a awm nia ngaiin, a mawhphurtua an ngaih CM Zoramthanga chu chhui turin April 11, 2022 khan Lokayukta-ah ngenna an thlen a; Lokayukta chuan bawhzuiin, chhui turin July 2022 khan ACB a hriattir a, ACB-in an chhui ta a ni.

Lokayukta hotute hnen aṭanga Vanglaini thu dawn danin, ACB hnena chhui chiang tura an hriattir hmain Lengpui Airport tihchangtlun chungchangah hian GAD leh PWD-ah thil ṭhenkhat an zawt hmasa a, document pawimawhte an dil bawk.

GAD leh PWD aṭanga document an dawnte chu Lokayukta chuan an zir chiang a, MFM-in CM Zoramthanga an puhna chu chhui zui tlakah ngaiin, chhui turin ACB an hriattir a, GAD leh PWD aṭanga chhànna leh document an dawnte pawh an thil tel a ni.

MFM chuan, PWD enkawltu CM Zoramthanga chu a thuneihna hmang sual leh chhung­khat lainâ duhsak uchuakah an puh a, "India Danpui Article 14 a bawhchhiat avang te, General Financial Rules 2017-a Rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.