Treasury-te'n ceiling an la nei lo; Mizoram sum dinhmun a ṭha lo?

Mizorama treasury hrang hrangte chuan ni khata sum pek chhuah theih zat (ceiling) an neih ṭhin chu hun eng emaw chen an nei tawh lo.

Vanglaini thu dawn danin, treasury-te hian Finance department-in special release (thil pawimawh bik atana sum pek chhuah) tura an tihte deuh chiah an pe ṭhin a, anmahni thua an pek chhuah theih awmchhun chu rîkrum (emergency) thilah chauh a ni.

Treasury-te hian ni khata pek chhuah theih zat bithliah (ceiling) an nei ṭhin a, treasury len dan azirin an ceiling zat a inang lo. Hun eng emaw ti chen ceiling an neih tawh loh chhan chu state sorkar sum dinhmunin a zir loh vangah an ngai.

Reserve Bank of India (RBI)-a Mizoram sum dinhmun nimin chawhma lam thleng khan a ṭha lo hle nia hriat a ni a; sum dinhmun a ṭhat loh zual chhan pakhat chu PMGSY sum leh centrally sponsored scheme (CSS) sumte pek chhuah vang a ni.

Hetih lai hian, thla liam ta, June thlaa sorkar hnathawkte hlawh chu nimin thleng khan pek chhuah a la ni lo a, treasury-a thawkte chuan pek chhuah theih hun tur an la sawi thei lo. Sorkar hna a nghet loa thawk (provisional employee)-te hlawh tur erawh pek chhuah a ni tawh.

June 2023 khan sorkar hnathawk zingah IFMIS tifel lo eng emaw zat an awm avangin hlawh a hlâwma pek chhuah a ni lo a, IFMIS tifel tawhte chauh pek niin, tifel apiang pek zel an ni. IFMIS hi an tifel deuh vek tawh. avangin tun thlaah chuan a hlawma sum pek chhuah a ngai dawn nia thu dawn a ni.