ANC building sak zawh har vangin zirlaite class an kal thei rih dawn lo

Aizawl North College (ANC) building zawmna sak zawh a la nih loh avangin zirlaite'n classroom an indaih lo a, tunkar chhung first semester zirlaite an châwl dawn.

ANC building sak zawm hna thawktu chu Finance department-a empanel firm SkyRidge Construction & Consultancy Services, Aizawl an ni a, RUSA 2.0 Component 9 (Infrastructure Grants to Colleges) hnuaiah cheng nuai 150 sênga sak zawh tura ruahman a ni.

RUSA State Project Directorate-in RUSA 2.0 hnuaia project thawh zawh tawh leh thawh mekte a tarlan danin, ANC building sak zawmna 'Construction of Academic building under Infrastructure Grants to Colleges during RUSA 2.0 at Aizawl, Mizoram' hi October 11, 2019-ah thawh ṭan a ni a, November 2022-ah sak zawh tura ruahman a ni.

Vanglaini palai zawhna chhangin ANC hotute chuan, college sak zawmna chu academic session thara hmang ṭan turin ruahman a nih thu leh classroom pawh kum dang ang loa indaihzai tura allotment an siam thu an sawi a, "Vawiinah (July 3, 2023) academic session kan ṭan dawn a, zirlaite awmna tura kan ruahman classroom thar turah tukverh, power supply, kawngkhar leh pindan bang a la awm lo. First semester zirlai 366 kan nei thar a, raltlante pawh an awm. Classroom thar sak zawh a la nih loh avangin awmna hmun tur an indaih rih lo a, tunkar chhung chu first semester zirlaite an chàwl rih ang," an ti.

Kum dangah chuan classroom atan an college-a room awm ang ang leh an college bula Commerce building an hman ṭhin thu sawiin ANC hotute chuan, "Subject hrang hrangin classroom pakhat an inṭâwm a, an inkal chhâwk ṭhin. Classroom thar tur hi contractor-in a sak zawh mai kan beisei avangin academic session thar atan luah lut turin subject hrang hrangte awmna tur kan siam fel vek tawh a, mahse, sak zawh a la nih loh avangin first semester zirlaite an chàwl rih ang a, third semester leh fifth semester zirlaite chauh kan kaltir rih dawn," an ti. Building zawmnaah in chung aṭanga tui far/pût a la awm thu leh a ban kâwi chu an siamṭhattir tawh thu an sawi.

Thu dawn danin, SkyRidge Construction & Consultancy Services hnenah hian ANC building sak zawmna tur pawisa PFMS kaltlangin Rs 1,28,13,430 pek a ni tawh. June 2020 khan Rs 22,50,000, October 2020-ah Rs 45,33,000, April 2021-ah Rs 10,00,000, March 2022-ah Rs 13,44,440, February 2023-ah Rs 12,22,682 leh May 2023-ah Rs 24,63,308 pek a ni.

RUSA State Project Directorate hotute chuan Vanglaini palai zawhna chhangin, ANC building satu contractor chu sa zo thuai turin an nawr ve reng niin an sawi a, "Thla 24 chhunga sak zawh tur a ni a, an sa chak lo tih kan hria a, sa zo thuai turin kan tur ve reng. Tunah hian July 28, 2023-a hawn hman tura sa zo turin kan ti," an ti a; project atan pawisa third instalment an la dawn loh thu an sawi.

Vanglaini palai zawhna chhangin SkyRidge Construction & Consultancy Services hotute chuan, college sak hna chu an theih anga chaka an thawh thu te, Covid-19 léng vangin hun eng emaw chen an thawh mumal theih loh thu te, hnathawh laiin zirlaite nen an inchiahpiah nasat ṭhin avangin an duh anga an thawh chak theih loh thu te, academic session laiin bungrua an mamawh lâk luhnaah harsatna a awm ṭhin thu te, bungrua an dah ṭhenkhat a bo ṭhin thute an sawi a ni.