Assembly leh NIT-a thawk tur lak danah zirlai pawlte an lungawi lo

Assembly Secretariat leh National Institute of Technology (NIT), Mizorama thawk tur tun hnaia lak danah thil dik lo a awm nia hriain zirlai pawl pahnih - MZP leh MSU-te chuan hma an la.

MZP chuan, tun hnaia NIT, Mizorama thawk tur laknaah thil fel lo a awm nia an hriat avangin ngun takin an chhui tih tarlangin, "NIT hna lak kalphungah NIT awmna state mi leh sa, tling leh tlak duhsak tura tarlan a nih ang zâwm loa ram neitute nék chêp zawng leh hlamchhiah zawnga hmalakna a awm ngei tih hriat a nih avangin hma kan la," an ti.

Hna lak chungchangah NIT, Mizoram Director chu a pisaah an hmu a, NIT kalphung anga hna ruak hnawhkhat tura an hrilh hnuah NIT, Mizoram chuan Mizo ṭhalai tling leh tlak a la ta niin MZP chuan an tarlang.

MZP chuan, tun hnaia Assembly Secretariat hnuaia thawktu laknaah induhsak bik vanga thawktute vua leh vâng lak an awm tih thâwm awm chu an chhui mek tih tarlangin, "RTI Act hmangin document hrang hrang dil mek a ni. Thil dik lo leh fel lo a awm a nih chuan Mizo ṭhalaite’n an dikna chanvo an hmuh ngei theih nan hma kan la dawn a ni," an ti.

MSU Gen.Hqrs hruaitute pawhin Assembly Secretariat-a hna lak chungchangah thil dik lo a awm nia a lan avangin nimin khan deputy chief minister Tawnluia chu a pisaah an hmu a; hna laknaah induhsakna leh thil dik lo tih a awm nia sawi chu chhui chiang tur leh dan loa thil ti an awm a nih chuan dan anga hrem turin an ngen. Assembly-a thawk tur lak dan chu a tàwp thlengin an chhui dawn a, RTI Act hmangin zawhna thehluh a ni tawh tih an tarlang bawk.