Synod-in Manipur buaina an dem; July 9 zanah an ṭawngṭai rual dawn
Mizoram Presbyterian Kohhran chuan thuchhuah siamin, Manipur buainaa thil thlengte an dem thu an tarlang a; Manipur-ah remna leh muanna a awm theih nan July 9, 2023 (Pathianni) zan inkhawmah an ṭawngṭai rual dawn.
Mizoram Synod chuan, Manipur-a Meitei leh tlang mite inkarah May 3, 2023 aṭanga buaina a chhuak leh mipuiin harsatna naménlo an tawk chu pawi an tih thu an tarlang a, "Mi tam takin nunna an chán te, biak-in, kohhran office leh quarters te, mimal in ṭhahnem tak hâl a nih avanga mi tam tak an vâkvaite leh thlaphâng taka an awmte hi pawi kan ti em em a ni," an ti.
Synod chuan, "Pawi sawi lo, nunau leh naupangte chena nunna lak a ni hi Bible zirtirna kalh tlat a ni a, hetianga râwng taka chête hi kan dem tak zet a ni," an ti a; India danpuia Right to Freedom of Religion palzûta Kristiante biak-in hâl leh tihchhiat leh, Kristiante thil serh bungrua chi hrang hrang hâla tihchhiat a ni chu pawi an tih thu leh an dem thu an tarlang.
Manipur buaina vanga thi te, in leh lo leh bungraw chán te, lu nghahna nei loa vâkvaite an lainat thu sawiin Mizoram Synod chuan, remna leh muanna a awm a, nunphung pangngaia an khawsak leh a, zalen taka Pathian an biak leh thuai theih an duh thu an tarlang a, "Chutiang a thlen theih nan chak taka hma la turin Manipur sorkar leh Central sorkar kan phûtin kan ngen a ni," an ti.
Mizoram Presbyterian Kohhran chuan Manipur buaina chungchangah an ṭawngṭai ṭhin chu chhunzawm zel turin kohhran mite an ngen a; Mizoram Kohhran Hruaitute Committee-in July 9, 2023 zana inkhawmnaah ṭawngṭai rual an rawtna chu zâwm a, ṭawngṭai rual ṭheuh turin tualchhung kohhran tin an ngen a ni.
ṬAWNGṬAI RUAL THUPUI TURTE
◆ Manipur-a chi leh chi inkara buaina chhuak a reh a, remna leh muanna a awm theih nan.
◆ Buaina avanga thite leh in leh lo chánte'n Pathian awmpuina leh thlamuanna an chan theih nan.
◆ Zah lo taka sakhaw hmun thianghlim leh Pathian biakna thil serh pawimawh tihbawrhbàn a nih tawh loh nan.
◆ India ramah Uniform Civil Code hman a nih loh nan.