Manipur buaina leh thil thleng dem

Manipur tualchhung buaina thla hnih a tlin hnuah pawh a la reh thei lo leh a la punlun zel chu an dem thu Central YMA leh World Kuki - Zo Intellectual Council ten thuchhuah siamin an tarlang.

Central YMA chuan, Manipur buaina a punlun zel chu pawi an tih thu tarlangin, "Buaina vanga nunna chán, hliam leh harsatna hrang hrang tâwk zawng zawngte kan tawrhpui tak zet a, mihring hlutna zahpah lo léka diriam leh nunrâwng taka insawisakna thleng phei hi chu kan hrethiam thei lo a ni," an ti.

CYMA chuan, Manipur buaina leh thil thlengte chu nimin khan Mizo Peoples Convention (MPC), Manipur hruaitute nen an sawiho tih an tarlang a, "Manipur buaina hi uluk taka thlir chunga hnam hrang hrangte inlungrual taka kalpui ṭul kan ti a, mimal leh páwl bil anga chêt lâkna hranpa nei lo a, a ṭul ang zela inràwnkhawm ṭhin ṭha kan ti," tiin an tarlang.

World Kuki - Zo Intellectual Council, Gen. Hqrs chuan, July 1, 2023 zanlai velah Meitei firfiakte leh state security force-te'n Chinglangmei khua, Churachandpur district an bei leh in 20 aia tlem lo an hâl te, mi pathum man a, an zinga pakhat rapthlak taka an that leh mi dang pahnih an la bo chu an dem tak zet thu an tarlang.

Meitei firfiakte leh an thurualpui state security force-te'n Chinglangmei an beih zawhah a bul hnaia khuate pawh an bei zui zel nia sawiin World Kuki - Zo Intellectual Council chuan, "Chief minister N Biren Singh chu a hmunah a kal a, a hmaa Khamenlok area-a a lo tih tawh angin sipaite a theih ang angin a pui a ni," an ti.