Manipur-a Mizote ngaihsak loah Congress party-in sorkar an puh

Congress party chuan, Manipur-ah buaina a chhuah reng lai leh Zo hnahthlakte'n harsatna nasa tak an tawh laia ngaihsak loa political campaign ringawta buaiah sorkar laipui hotute an puh a; Mizoram chief minister Zoramthanga pawh hmalak ngaihna hre lo leh campaign buaia buaiah an puh bawk.

MPCC chuan thuchhuah siamin, Manipur buainain thla hnih chuang a awh tawh a, mi 100 chuang thiin, biak-in leh chenna in sang chuang hâl chhiat a ni tawh a, mi 50,000 chuang relief camp 1,000 chuangah an awm mek tih an tarlang a; July 2, Pathiannia Meitei hoin Langza khuaa in leh biak-in an hâl fai vek leh David Thiek râwng taka an that chu rapthlak an tih thu an tarlang a ni.

MPCC chuan, "Manipur khaw tin mai a alh hluah hluah lai pawhin Home minister Amit Shah leh PM Narendra Modi te chu political campaign-in an buai. Tlai khaw hnuah Amit shah-a'n Manipur a tlawh a, awmzia a nei lo. PM Modi erawh Manipur tlawh chu sawi loh, a ngawi hmak," an ti.

Manipura Zo hnahthlakte an rûm tak meuh laiin Mizoram CM Zoramthanga'n hmalak ngaihna a hre lo nia sawiin MPCC chuan, "Kan unaute himna leh dam khawchhuahna lam ngaihtuah loin campaign buaiin a buai. Amah be duh lotu Manipur CM Biren Singh-a'n Zo hnahthlakte chunga râwng taka chêt hnuah phone hmanga biain, chu chu a hmalakna neih chhun a ni," an ti a; CM Zoramthanga hnuaiah Mizoram leh Zo hnahthlakte dinhmun a him lo niin an sawi.

MPCC chuan, Manipur-a Zo hnahthlakte chunga râwng taka chêtna titawp tura hma la thuai turin MNF sorkar an ngen a, "Kan unaute dinhmun hima an awm hma loh chuan BJP an thawhpuina a rang lama chhu chat nghal turin kan ngen. MNF party nge a dah pawimawh, Mizoram mipui leh Manipur-a Zo hnahthlakte himna tih thlang fel thuai turin kan phût a ni," an ti.

Congress party chuan, Manipur-a Zo hnahthlakte tana Mizoram mipui, tlawmngai pawl leh kohhrante'n nasa taka hma an la chu chhuanawm an tih thu an tarlang bawk.