Plastic Bag Free Day hman a ni

Nimin kha International Plastic Bag Free Day a ni a, Mizoram hmun ṭhenkhatah hman a ni. Aizawlah chuan New Capital Complex-ah UDPA department leh Swachh Bharat State Mission buatsaihin hman a ni a, deputy chief minister Tawnluia'n hmanpuiin, hman khat daih sarang (plastic) hmang lo tura inzirtirna, ‘Ban on Single Use Plastic Drive’ a hawng.

Deputy CM chuan, "District tinah solid waste management center din vek tum a ni a, AMRUT 2.0 hnuaiah faina kawnga hmasawnna thlen tum a ni. Hman khat daih sarâng titawp turin kum 2021 aṭangin sorkarin hma a la tawh," a ti a; hman khat daih sarâng titawp turin district hrang hrangah inspection team-te'n bazar leh dawr an endik ṭhin thu a sawi.

Hman khat daih sarâng titawp turin sorkarin mipui thawhpuina a mamawh tih sawiin Tawnluia chuan, "Bawlhhlawh a báwma paih leh thianghlimna chungchang inzirtirna hi chhungkuaah bul ṭan a pawimawh a, ṭhalaite'n nu leh pate an kaihhruai a ṭul," a ti.

UDPA secretary Lalmalsawma Pachuau kaihhruai inkhawmah hian chief secretary Dr Renu Sharma pawhin thu sawiin, hman khat daih sarâng khapna chu November 5, 2021-ah kalpui ṭan a nih thu leh Action Plan siam a nih thu a sawi.

Inkhawmah hian UDPA joint director Malsawmzuala kaihhruaiin hman khat daih sarang hmang lo tura intiamna thu sawi rual a ni a; tun hnaia ‘Cleanliness Trekking Expedition’ neia Lailapur aṭanga Khaikhy (Siaha district) thleng kea km. 623 kal Vanlallawmzuala Varte hnenah chawimawina hlan a ni.

International Plastic Bag Free Day pual hian Kolasib district-a sorkar pisa hrang hranga thawkte pawhin nimin khan hman khat daih sarâng (plastic) hmang lo tur leh mi dang pawh hmang lo tura zirtirtu ni turin thutiam an sawi rual a ni.