Kum 100 tling mi 19 chawimawi

Vawiin October 1 hi Upate Ní a ni a, he ni pual hian Social Welfare department (SWD) chuan nimin khan Social Welfare minister Dr K Beichhua pisaah upate chawimawina hun an buat­saih a, Mizorama kum 100 tling mi 19 hnen­ah chawimawina an hlan.

Minister Dr K Bei­chhua chuan, MUP-in Mizo­­rama kum za tling an zawn chhuahnaah mi 19 an hmu tih sawiin, kum 100 tling eng emaw zat an awm chu ropui a tih thu a sawi a, "Anmahni tel ngeia chawimawina hun buatsaih a châkawm rualin, kan hun tawnin a zir loh avangin mi tlem tê chauh telin hun hman a ni a, MUP kutah chawi­mawinate hlan a ni," a ti. 

Sorkar leh SWD-in a theih ang angin upate an ngai pawimawh tih sawiin K Beichhua chuan, hnam ang pawhin ṭhangtharte'n upate hlutna hriain ngaih­sak nachang kan hre chho zelte hi thil lawmawm tak a ni," a ti a; upate tawnhriat aṭangin ṭhangtharte'n zir tur tam tak an neih thu a sawi.

SWD Minister K Bei­chhua chuan, SWD-in an phâk tâwkin upate har­­satna tawh sutkian leh anmahni enkawlna an ngaihven reng thu sawiin, Aizawl leh Lung­leiah upate awmna tur Old Age Home sak ṭan nan concept note siama hmalak mek a nih thu a sawi bawk.

Inkhawmah hian Mizoram Upa Pawl leh Mizo Upa Pawl (Lunglei) hruaitute hnenah kum 100 tling mi 19-te chawi­mawina pawisa Rs. 1,000 leh thuchei an hlàn a; MUP pahnihte'n a dawngtu turte hnenah an hlàn ve leh ang. Chawi­mawi zingah kum 105 mi pahnih - Aiziki, Lung­lei Chanmari leh Kap­chhawna Mualcheng South-te chu upa ber an ni.

Kum 100 tlingte chawimawina inkhawm hi SWD secretary HL Ro­chungnunga'n a kaihruai a; MUP hruai­tute'n Upate Ni chungchang an sawi.