Aizawl Smart City ICCC hman ṭan a ni

Aizawl Smart City Limited hnuaia din Integrated Command & Control Centre (ICCC) bun thar chu nimin khan UDPA department enkawltu deputy chief minister Tawnluia'n a hawng a, a takin hman ṭan a ni.

ICCC hi Treasury Square-a Smart City pisa-ah bun a ni a; Tawnluia chuan, ICCC chu mipui tan a ṭangkai hle dawn tih sawiin, "Information pawimawh hriat zung zung theihna a nih bakah, misual hnuchhuina leh traffic dan kenkawhnaah a ṭangkai hle dawn. Hmun dang aṭanga Aizawla rawn zinte pawhin an duh zawng information an neih zung zung theihna tur a ni," a ti.

ICCC dinna atan hian cheng vbc. 117.98 ruahman a ni a, March 7, 2020 khan contract agreement ziah a ni. ICCC-ah hian control room, conference room, reception area, operator room leh data centre changtlung tak a awm. Vantlang mipui tana a thlawna hman theih tur Aizawla hmun 15-ah wifi bun a ni.

ICCC hnuaiah hian Aizawl khawpui chhunga hmun 76-ah surveillance camera bun niin, chungah chuan camera 236 vuah a ni a, Pan Tilt Zoom (PTZ) 39 vuah a ni bawk. Khawpui kawtchhuah hmun 14-ah automatic number plate recognition camera (lirthei number latu bik) dah a ni a, facial recognition system (mihring hmai/hmel chiang taka la thei) hmun pangaah dah a nih bakah, hmun paliah environmental sensor dah a ni.

Aizawla bawlhhlawh paih lirthei 140-ah GPS vuah a ni a, hmun paliah Aizawl khaw chhung chanchin hriat zung zung theihna variable messaging display dah a ni bawk.

ICCC hawnna inkhawmah hian UDPA secretary Lalmalsawma Pachuau pawhin thu a sawi a; Aizawl Smart City chief executive officer CC Lalchhuangkima'n technical report a sawi a ni.