ZPM hi Zoram ṭhatna veitute ṭawngṭai chhuah a ni - ZPM PAC member

ZPM party chuan nimin khan an pisaah inkhawm an nei a; ZPM Political Affairs Committee member B Lalchhanzova'n thu sawiin, ZPM chu ram chhung leh páwna Mizoram ṭhatna veitute sual chhuah leh ṭawngṭai chhuah a nih thu a sawi.

B Lalchhanzova chuan, ZPM chu ṭobul mumal tak neia indin an nih thu sawiin, "Ram chhung leh páwna Zoram ṭhatna veitute sual chhuah leh ṭawngṭai chhuah a ni a, kan kal dan hi party dang tan hman thiam ve chi a ni lo. Inchhit ral ngamna aṭang lo chuan hman ngam chi a ni lo a, keini chuan kan hmang ngam a, kan hmangaih Zoram tan ram mipui zawng zawng i thawkho ang u," a ti.

Kum 2018 inthlanpuiah ZPM-in bial tam zawkah candidate tur an hmu zo meuh lo tih sawiin, "Tlawmngaih chhuaha ding kan ni fur," a ti a, tunah chuan candidate tur mi ṭha tak tak an neih tawh thu a sawi. Party inrêlbàwl danah beih an tâwk tih sawiin, "Congress leh MNF-te'n an party inrêlbàwl dan aṭangin min teh a, tlawn rawn tur lal em em mi pakhat an siam ṭhin ang bak chu party inrêlbàwlna awm theiin an ring lo. ZPM chuan thuneihna sem zai hi a takin kan hmang ngam a, mi pakhat rorelna angin kan kal ve lo," a ti bawk.