KHAWTHLIR

Thisen pe

Central Higher Secondary School NSS chuan nimin khan Civil Hospital, Aizawl tan thisen unit 75 an pe a, petute mipa 60 leh hmeichhia 15 an ni.

YMA-in vehbûr an khawn dawn

YMA Sub-Headquarters, Lunglei chuan Vaṭhuampuia Bangla­desh ráltlânte tan Lunglei khawpuiah vehbúr an khawn dawn. Bangladesh aṭanga Zo hnahthlak ráltlân, Vaṭhuampui khua, Lawngtlai district-a awm mek chhungkua 302-te chu chhuanchhamin an awm mai dawn a, bungbél, thawmhnaw leh mutbuah harsatna nasa tak an tâwk tih thu an dawn avangin Lunglei Sub-Hqrs YMA chuan Lunglei khawpuia YMA branch hrang hrangah vehbúr khawn an rel a ni.

Corporator-in fund hman dan a sem

AMC Ward-VIII corporator Christina Roluahpuii Sailo chuan kum 2022-23 chhunga ward fund hman dan an ward mipui hnenah a sem. Christina-i chuan, fund hman dan tur chu Ward Committee-ah rèl ṭhin a nih thu tarlangin, "Kan ward ta a nih avangin ward tana sum lo kal hmannate ward mipuite hriattir hi ka tihmâkmawhah ka ngai," a ti. Christina-i hian kum 2021-22 chhunga fund hmanna pawh ward chhunga mipui hnenah a lo sem tawh a ni.

CM kaihhruaiin RUSA sawiho

Chief minister Zoramthanga kaih­hruaiin nimin khan a pisaah Higher & Technical Education minister Dr R Lalthangliana leh HTE hotu dangte a kâwm a, Rashtriya Uchchatar Shiksha Abhiyan (RUSA) chungchanga sum hmuh dan leh kal zel dan tur an sawiho. New Education Policy 2020 kalpui ṭan a nih tawh dawn avangin thawktu indaih lohna, a bik takin non-teaching staff lama harsatnate sutkian dan tur an sawiho nghal bawk.

Thutiam sawi rual

Kolasib district-a sorkar pisa hrang hranga thawkte chuan nimin khan International Plastic Bag Free Day pualin hman khat daih sarâng (plastic) hmang lo tur leh mi dang pawh hmang lo tura zirtirtu ni turin thutiam an sawi rual. Hei hi hman khat daih sarâng tihtlêmna tura hmalakna a ni.