Mizoramin ṭhalaite thluak a mamawh - Dy. Chief Minister

Mizoram Youth Commission (MYC)-in Coaching Centre leh Youth Centre a sak tur lungphùm chu nimin khan New Capital Complex-ah deputy chief minister Tawnluia'n a phúm a; thu sawiin, Mizoramin ṭhalaite thluak a mamawh thu a sawi.

Deputy Chief Minister chuan, khawvel ṭhang chak takah Mizoramin ṭhalaite thluak a mamawh tih sawiin, "Ramin a hman ṭangkai theih tura nasa taka tuai hriampui a pawimawh. Ṭhalaite hmasawnna tura hmalakna pawimawh tak chak taka kalpui mektu MYC-in Youth Centre leh Coaching Centre sakna tur bul a ṭan thei ta hi a lawmawm hle a ni," a ti.

Tawnluia chuan, sorkarin ṭhalaite a ngaihven a, a tih tur a tih thu sawiin, "Chumi tihlawhtling tura chona ropui tak hi ṭhalaite'n an chhàn lêt a ṭul," a ti a; Mizoram Coaching Centre leh Youth Centre chu ṭhalaite'n an chhawr ṭangkai ngei a beisei thu a sawi.

MYC chairman Dr Vanlalṭanpuia, MLA chuan, ṭhalaite'n 'Kan office' an tih theih tur in pahnih sa tura lungphûm phùm a ni chu lawmawm a tih thu a sawi a, "India ram pum inelna sanga Mizo ṭhalai tam zawk an lan theihna tura thil ṭangkai a nih ngei kan beisei," a ti.

Dr Vanlalṭanpuia chuan, ram danga hnathawk, Covid-19 vanga an hna chánte tuamhlàwm dan tur ruahmanna MYC-in a siam mek thu a sawi bawk.

Inkhawma tarlan a nih danin, Coaching Centre sak nan hian cheng nuai 300 leh Youth Centre sakna atan cheng nuai 500 ruahman a ni a, kum thum chhunga sak zawh tura ruahman a ni.

Coaching Centre chu chhâwng thuma sak tur a ni a; coaching room, computer room, cafeteria, conference hall, office leh quarter-te a awm dawn. Youth Centre-ah chuan career guidance/knowledge centre, gym room, guest room, indoor hall, meeting room, officer leh art & craft room-te a awm ang.