Commerce & Industries Minister hoin PMFME hnuaia hmalak dan tur sawiho

Nimin khan Commerce & Industries minister Dr R Lalthangliana hoin Secretariat conference hall-ah Commerce & Industries, Horticulture, Fisheries, Sericulture, AH & Vety, UD&PA depy. leh MIFCO hotute'n Pradhan Mantri Formalisation of Micro Food Enterprises (PMFME) scheme hnuaia hmalak dan tur an sawiho.

Dr R Lalthangliana chuan Covid-19 vanga India ramin harsatna a tawh nasat zual lai tak June thla tawp khan sorkar laipui chuan PMFME scheme a rawn duan chhuah thu sawiin, "He scheme hi cheng vaibelchhe singkhat hu niin, kum 5 chhung kalpui tur a ni. Mizoram hian Food processing-ah potential kan nei ṭha em em mai a, kuthnathawktute leh ṭhalai mahni kutke a din tum ten an chhawr thiam chuan a ṭangkai hle dawn a ni," a ti.

Covid-19 vanga eizawnna kawnga harsatna tawk kuthnathawktute leh entrepreneur-te chhawmdawlna tur ruahmanna hrang hrang sorkar laipuiin a kalpui mek tih sawiin Dr R Lalthangliana chuan, "Hripui vangin phaia lama hnathawk thalai ṭam tak Mizoramah an rawn haw a, boruak zia awm hnuah an let leh vekin a rinawm loh bakah hnathawh tur hmuh a harsa thei," a ti a, ṭhalaite tan eizawnna ṭha leh changtlung siamna tur atan kawng kawhhmuh a pawimawh thu a sawi.

Meeting-ah hian thlai rah, thei rah leh sa thianghlim leh awmze nei zawka sawngbawl bakah hlawk zawka hralh theih tura sawngbawl dan tur Mizorama kalpui theih tawk tur nia hriatte sawiho a ni.

Mizoram chhung ngeia ran chaw thar chhuah tam lehzual a pawimawh dan te, changpat hmanga leiṭha siam (vermicompost) project UDPA-in an hlawhtlinpui ṭan mek thu te, dragon fruit leh sum chang thei thlai chi hrang hrang hmanga ṭhalaite tana eizawnna ṭha siamsak dan turte leh a hralhchhuahna (market) chungchangte sawiho a ni bawk.