Larsap hoin AIFF leh SAI webminar

Nimin khan Sports Authority of India (SAI) leh All India Football Federation (AIFF)-te chuan online hmanga football zirna kalpui dan tur chungchang sawihona (webinar) an buatsaih a, Governor PS Sreedharan Pillai-a'n a hmanpui.

Larsap chuan, SAI leh AIFF ṭangkawpin infiammite tana pawimawhte online kaltlanga sawi­hona hun an buatsaih chu lawm­awm a tih thu sawiin, "E-Pathshala Web Platform kaltlang hian social distancing bawhchhe si loin football khel ṭhinte'n an thiamthilte an inzirtir thei dawn a, football khelh inzir­tirna ṭangkai tak a ni ang," a ti.

Webinar chu football âtchilh state pahnih Kerala leh Mizoramte football huanga an thawhhona remchang a nih thu sawiin PS Sreedharan chuan, "State pahnihah hian football chu eizawnna tling a ni tawh. Mizoram aṭang phei chuan football khel thiam state páwn lamah eizawng tam tak an awm mek a ni," a ti a; Mizoram tan football chu mite'n an hriat lârna leh Mizoram brand name a nih tawh thu a sawi.

Khualzahawm Sports minis­ter Robert Romawia chuan, SAI leh AIFF-in hripui léng kara infiammite hmakhua ngaih­tuaha workshop an buatsaih chu lawmawm a tih thu a sawi a, "Mizorama infiammite hmasawnna turin sorkar laipui leh Mizoram sorkarin infrastructure development-ah chak takin hma a la mek. Workshop-a ngaihdan ṭha tak tak kan sawihote hi infiammite pawhin an sâwtpui ngei ka beisei," a ti.

Workshop-ah hian AIFF Grassroots manager Rathin Saha paper buatsaih zirho a ni a, AIFF member Lalnghinglova Hmar leh MSSC secretary John Ṭanpuia te pawhin thu an sawi. India ram hmun hrang hrang aṭangin infiammite aiawhin mi 100 chuangin an chhim a ni.