Hnahthial district-ah thubuai 21
Nimin khan Hnahthial superintendent of police Lalbiakkila hoin SP pisaa training hall-ah Hnahthial district crime review meeting neih a ni. He hunah hian kumin January 1 aṭanga nimin thleng khan an district-ah thubuai (case) 21 ziah luh (register) a ni tawh tih an tarlang.
SP Lalbiakkila chuan, police ṭha ni turin FIR bawhzui ṭhat a pawimawh thu sawiin, "Police-ah hian case investigation aia hna lian leh pawimawh a awm thei lo a, FIR lut kan bawhzui dan leh kan chhui chhuah leh chhuah loh hi mipuite'n min tehna a ni fo. In ṭha pui pui leh hmanraw changkang tak tak nei mah ila, FIR kan bawhzui ṭhat loh chuan police ṭha kan ni thei ngai lo ang," a ti a; miin FIR an thehluhte rang taka bawhzui ṭhin turin police-te a chah.
Lalbiakkila chuan, police officer-te'n thuneihna sang tak nei mah se, an hman thiam loh a hlauhawm thu sawiin, "IPC leh Cr.PC-te hi keimahnia bet tlat a ni tih hre rengin kan hre bel tur a ni. Dan hre lo tan a huaisen theih loh avangin investigator ṭha ni turin dan kan hriat a ngai a, kan chhiar tam a ṭul," a ti a; mahni huam chin hriat chian a pawimawh thu leh mipui leh khawtlang hruaitute nen thawhho ṭhat a pawimawh thu a sawi.
Hnahthial SP chuan, Covid-19 kaihhnawih dan bawhchhia an mante sum chawi tling khawm chu Rs. 88,200 a tlin tawh thu a sawi bawk.
Review meeting-a an tarlan danin, Hnahthial district-ah hian January-September, 2020 chhungin thubuai 21 ziah luh a ni tawh a, chu'ng zinga panga chu chargesheet an thehlut tawh. Thih dan pangngai loa thihna (unnatural death) pasarih a awm tawh a ni.