ZPM hruaitu tharte lawmpui

Zoram Peoples' Movement (ZPM) Ṭhalaite chuan thuchhuah siamin, ZPM Val Upa Council kaltlanga ZPM party office bearer atana ruat tharte chu Pathian remruatah an ngai a, thinlung taka an lawmpui thu an tarlang.

ZPM Ṭhalai chuan, VUC chu ZPM-in kalphung thar hmanga Mizoram a khai chhuah theihna tura a ban pawimawh a ni tih sawiin, "Mi rilru fím leh thil ṭha duh, khawtlang leh kohhrana mi hmingṭha, thiamna leh sorkar inrêlbàwlnaah experience ṭha tak neite'n ZPM min ho zel hi lawmawm kan ti. VUC-in Pathian ráwn chunga an ruat chhuah ZPM OB-te thâ ti chak turin ṭhalai chuan theihtawp a chhuah zel dawn a ni," an ti.

Politics-ah mi ṭha leh finga ngaihte pawh an awmna party hruaitute'n an zir loh avangin ram tana an hmathlir leh duh dante tihlawhtling thei loin, dîp rala an awm ṭhin thu sawiin ZPM ṭhalaite chuan, "An duh loh dana pên luihtir an nih phei chuan an political career tan thil pawi tak a ni. Politician hlun kan tihte hruaina hnuaiah kan thlen chin chu hetiang hi a ni," an ti a; Mizoramin politics khelh thiam aia ram tana thil ṭha tih duhtu hruaitu ṭha a mamawh thu an sawi.