Chief Minister, MKHC leh Synod-in UCC duh loh thu ziakin an thlen

MNF president leh chief minister Zoramthanga, Mizoram Kohhran Hruaitute Committee (MKHC) leh Mizoram Presbyterian Kohhran chuan nimin khan Law Commission of India hnenah lehkha thawnin, Uniform Civil Code (UCC) an duh loh thu leh India ramah hman an duh loh thu an thlen.

CM Zoramthanga chuan nimin khan MNF President a nihna angin Law Commission of India member secretary Khetrabasi Biswal hnenah lehkha a thawn a; India ram puma UCC hman tumna chu MNF party chuan an pawm loh thu a tarlang.

Zoramthanga chuan, UCC chungchang chu February 14, 2023 khan Mizoram Legislative Assembly-ah sawiho a nih thu leh official resolution siam a nih thu a tarlang a; "He House hian India rama UCC kalpui tumna leh hmalaknate a dodal tlat a ni," tiin resolution-ah ziah a nih thu a tarlang a ni.

Mizoram Assembly-in UCC an dodal chhan ziakin Zoramthanga chuan, "Mizote leh hnam leh sakhaw tênau zawkte sakhua, hnam nunphung leh chìn dan, hnam dante tihbona tur a ni a, ram mipui inlungrual lohna thlentu tur a ni," a ti a; UCC chu MNF leh India sorkarin June 30, 1986-a Memorandum of Settlement leh Indian Constitution Article 371G kalh a nih thu a tarlang bawk.

MKHC leh Mizoram Synod-te hian Law Commission Member Secretary hnenah lehkha an thawn a; MKHC chuan, MKHC chuan UCC chu an pawm theih loh thu leh India ramah hman tum a ni chu an dem thu an tarlang a, "UCC hi hnâwl tur leh hman tumna hi titawp turin kan ngen a che," an ti.

MKHC chuan, Mizote sakhua, rorelna, ram neitu nihna leh ram lei leh hralh chungchangahte leh Mizo Customary Law chungchangah inremna thuthlung, Memorandum of Settlement (Peace Accord) a awm thu an tarlang a, "UCC hi India rama sakhua, hnam nunphung leh chin dan hrang hrang awmna a ni a, chuvangin UCC hi hman a remchang loah kan ngai," an ti a; UCC hman a nih chuan Indian Constitution Article 371G-in Mizorama hnam tenaute a humhalhna a kalh thu an tarlang.

Mizoram Synod chuan, India ram chu sakhaw hrang hrang awmna, rilru puthmang leh rin dan hrang hrang awmna a nih angin, tihdan inang tlang kalpuina tur UCC chu hman a remchang loa an ngaih thu leh India ram - democracy leh secular state a nihna kalh a nih thu an tarlang a, "UCC hian hnam tenau, a bikin Mizoram mipui leh Kristian, tih dan leh hnam dan (customary law) hrang neite nunphung a tibuai hle dawn a ni," an ti.

Indian Constitution-a Fundamental Rights, a bikin Freedom of Religion chu UCC-in a kalh tih sawiin Synod chuan, "Kristiante leh hnam tenaute tan a him lo hle a ni," an ti a; Mizoram mipui rilru leh Mizo hnam kal zel tur ngaihtuahin, UCC kalpui lo tur leh India ram, democracy leh secular ram a nihna humhim turin an ngen a ni.