Vaivakawna leiminin kawng a hnawh

June 16, 2023 zinga Vaivakawn thlanmual bul, national highway chhaka lei minna hmunah July 3, Thawhṭanni zan zanlai pelh hnu, dar 12:30 vel khan lei a min leh a, leimin hian he thu ziah lai thleng hian NH kawngpui a la hnawh pin avangin lirthei tlan tlang theih a ni lo.

Vaivakawn aṭanga Vanglaini thu dawn danin, lei hi min belh reng thei a la ni a; in pahniha chhungkaw panga chu an bungrua thiar chhuah niin, an chhungte an bèl hlawm. Lei minna bul hnai, Vaivakawn Zohnuai-Ropaiabâwk inkar kawngah lei khî a awm nual a, hei vang hian he kawngpui hi khâr rih a ni.

Ruah a sûr ṭhin avangin leimin thenfai hna thawh chak theih a ni lo a, lirthei kal theiha thenfai theih hun tur hriat a ni rih lo. Lengpui/Sairang lama kal tur tan Sakawrtuichhun kawng lamah kal a ngai.