KVM High School golden jubilee lawm

KVM High School chuan nimin khan an 50 tlinna, golden jubilee sikul tualah an lawm a, School Education minister Lalchhandama Ralte leh minister of state Robert Romawia Royte-in an hmanpui.

Minister Lalchhandama Ralte chuan, tun hma chuan zirna leh mission chu kal kawp ṭhin a nih thu sawiin, "Tun hnaiah mission nen phawkhai rual takin zirna kalpui a ni leh ta a, zirna-ina vantlang inrawlhna pawh a kal ṭha leh viau tawh. He hnam hian zirna hi hmun pawimawh kan pek chuan kan ram hian hma a sawn ang," a ti a; MLA-te pawhin an fund tam zawk zirna tihhmasawnna atan an hmang tih a sawi.

Sorkarin zirna a ngai pawimawh tih sawiin Lalchhandama chuan, "Zirna ṭha neih a nih theih nan tunlai hmanraw changkang zawk nen NEP rawtna mila kalpui zel tum a ni," a ti a; zirtirtute chu zirtir thiamna mai bakah, missionary rilru púa zirlaite enkawl turin a sáwm a, hmathlir thui tak nei a, ruih theih thila inthiar fihlim turin zirlaite a fuih. Golden jubilee lawm nan July 2023 aṭangin KVM H/S-ah hostel a taka kalpui a nih dawn thu leh hostel-a awmte ei leh in zawng zawng sorkarin a tum dawn thu a sawi bawk.

Khualzahawm Robert Romawia Royte chuan, KVM H/S-ah mathematics zirtirtu rawih belhsak a tum thu a puang a; zirlairte chu taimâk chhuah a, jubilee lawm nan result ṭha tak neih tum turin a fuih.

KVM H/S hi Kapthangvunga hming chawiin March 30, 1973-ah hawn a ni a, kum 1991-ah sorkarin a la (provincialise) a, kum 1992-ah HSLC exam centre atan hman ṭan a ni. Golden jubilee lawmnaah hian he sikula thawk leh zir chhuak tawhte bakah, sikul awmna veng khawtlang hruaitute'n an hmanpui. Tlaiah jubilee lawmna ruai an ṭheh a ni.