BSF sipaiin ralthuam an man Hnam tana mualphothlakah ngai

Mizoram Pradesh Congress Committee (MPCC) chuan, dan loa thil tawlh rûk man leh ram venhim kawngah Mizoram police-te aia BSF hming a lang zawk ta fo nia sawiin, hnam tan thil mualphothlak a nia an ngaih thu leh Home Minister chak loh vanga an ngaih thu an tarlang.

Nimina MPCC thuchhuah chuan, September 28, Thawhṭanni zana Phuldungsei khuaa silai 30, magazine 28 leh silai mû 7,800 lai BSF-te'n an man chu lawmawm an tih thu a tarlang a, "Dan loa thil tawlh rûk te, ram leh hnam venhim kawngahte police-te aia BSF hming a lang zawk ta fo hi hnam tan mualpho thlak kan ti a. BSF-te'n Mamit district-a Phuldungsei leh a chhehvela hel ho an awm nia report an dawng hi a mak kan tiin, MNF sorkar hnuaiah hel páwl an zalen leh ta nia lang hi a pawi hle," an ti.

Congress party chuan, MNF sorkar apiangin hel leh ralthuam man tur an awm ziah nia sawiin, "Pawi kan tiin mipui tana rorel tlak an nih lohzia a lang chiang hleah kan ngai," an ti a; MNF sorkar apianga Mizorama hel pawlte an zalên ṭhin leh ralthuam man tur a tam em em zel chu mak an tih thu an sawi.

MPCC tarlan danin, MNF sorkar hmasak lai, kum 1998-2008 chhungin Mizoramah rálthuam tam tak man a ni a, Aizawl khawpui daifémah ngei hel pawlin ngampa takin camp hial an lo nei tawh. April 2007 velah hel pawl nena inthuruala police rálthuam hralh rûk a nih thu, MLA thenkhatin nasa takin an au chhuahpui tawh a, Aizawl khawpuiah hel ho kutthlakna nia rin ruang chhar a ni fo bawk.

MNF party leh an kaihhruai Mizoram sorkar chu mipui himna leh thlamuanna ngai pawimawh loah puhin MPCC chuan, "MNF party hi tun thlenga hel pawlte nen inzawmna thûk tak la nei reng nia an lan avangin remna leh muanna sawi ve tlakah kan ngai lo a, an sorkar hmasa a rûka hel thawhpuia sum leh paia inṭanpuina ang kha thleng nawn tawh lo se kan duh," an ti.