UCC leh Manipur buaina puala ṭawngṭai turin MKHC-in an ngen

Mizoram Kohhran Hruai­tute Committee (MKHC) chuan India ramah Uniform Civil Code (UCC) hman a nih loh nan leh Manipur tualchhung buaina a reh theih nan July 8/9-ah ṭawngṭai rual turin kohhran hrang hrangte an ngen.

MKHC chuan, UCC leh Manipur buaina chungchangah ram pum huapin kohhran hrang hrang leh an hnuaia tual­chhung kohhrante chu ṭawngṭai rual turin an ngen a, "Mahni remchan dan ang angin July 8/9, 2023 (Sabbath leh Sunday) hian ṭawngṭai rualna neih ni se tiin MKHC chuan a rel," tiin, MKHC ngenna chu bawhzui turin tualchhung kohhran tinte an chah.

MKHC chuan thuchhuah siamin, Manipur-a chi leh chi inkara May 3, 2023 aṭanga buaina chhuak chu pawi an tih tak zet thu an tarlang a, "Sakhua hmunhma te, biak-in leh kohhran bungruate inzahsak lo taka tihchhiat hi kan dem a, thleng tawh lo se kan ti," tiin, buaina vanga mi tam tak an thi chu pawi an tih thu leh mitthi chhungte an tawrhpui thu an tarlang.

MKHC chuan, Manipur tualchhung buaina vanga in leh lo, chênna tur nei lo te, sahimna zawnga ráltlân leh ei leh in tur nei lote mahni theih ang tâwka ṭanpui tur in kohhran pawl hrang hrang te, tualchhung kohrante leh mipui an ngen a; Manipur-ah remna leh muanna a awm thuai theih nan rang tak leh chak taka hma la turin MKHC chuan sorkar laipui, state sorkar leh pawl hrang hrang an ngen bawk.

ṬAWNGṬAI THUPUI TURTE

▶ India sokarin hman tuma hma a lak mek - UCC chu hnam inpumkhatna tichhe thei, hnam tlem zawk leh sakhua tlem zawkte nêkchêpna leh chîmralna a nih theih dawn avangin tihpuitlin a nih loh nan.

▶ Manipur-a chi leh chi inkara buaina chhuak a reh theih nan, buaina vanga thi chhungte tan leh, in leh lo chán zawng zawng tan.

▶ Sakhaw hmun thianghlimte zah lo tak leh pawisalo taka tihchhiat leh tihbawrhbân a nih tawh lohna turin.