Tlabungah nurse indaih loh avangin VC leh MZP ten nurse an ruai

Tlabung damdawi-in (Sub-Divisional Hospital)-ah nurse an indaih loh avangin he damdawi-ina thawk turin Tlabung village council leh MZP-te chuan nurse pahnih an ruai mek.

Tlabung MZP chuan thuchhuah siamin, tunlai hian Tlabung leh a chhehvelah natna chi hrang hrang (sikserh, typhoid, rannung seh, etc.) a tam tih an tarlang a, "Damlo admit ngai an tam a, khumin a daih thei meuh lo. Heng damlote enkawl tur hian nurse indaih lohna a nasa a, experience an neihna tura hlawh nei loa thawk (volunteer) nurse-te avangin mualpho loin kan awm thei rih a ni," an ti.

Volunteer nurse-te chu nimin aṭang khan chawlh an tum tawh tih tarlangin MZP chuan, "Nurse indaih lohna a nasa dawn a, damlote tan harsatna awm thei niin a lang. Chuvangin, kan VC-te nen ṭangkawpin volunteer-a lo thawkte zinga nurse pahnih chu kan chhawr chhunzawm dawn a ni," an ti a; Tlabung damdawi-ina nurse indaih lohna chu sorkarin a hriat ngei an rin thu an tarlang.

Tun dinhmunah chuan Tlabung SDH-a nurse indaih lohna avangin sorkar nawr a, sorkar tan harsatna siam an tum lo tih tarlangin Tlabung MZP chuan, "Khawtlang hian kan theih chen chen nurse a chhawr dawn. Chutihrual erawh chuan nurse lak thar tur zinga pahnih tal chu kan khaw damdawi-ina thawk tura dah turin sorkar kan ngen a ni," an ti.

Tlabung Sub-District hi Mizorama damdawi-in upa bera ngaih a ni a, nikum khan kum 150-na an lawm. Tlabung leh a chhehvela mi 30,000 chuangin damdawi-in an inṭâwm a ni a; nurse pali awm mekin, a ngheta thawk pahnih leh a nghet loa thawk pahnih an ni.