Kum tling loa lirthei khalhah Traffic police an khauh dawn

Aizawl Traffic SP Stephen Lalrinawma chuan, kum 18 tling lote lirthei khalhtirtu chu Rs 25,000 chawitir leh kum thum thleng jail-ah tàntir theih a nih thu a tarlang a; lirthei neitute chu kum tling lote lirthei khalhtir lo turin a hriattir.

Traffic SP chuan, kum tling lo lirthei khalh chu danin a ngai thutak hle tih a tarlang a, "Kum tling loin a hman lirthei registration chu thla 12 cancel tur a ni a, kum tling loa lirthei khalhtu chuan kum 25 a tlin hma loh chuan driving licence leh learner licence pawh a neih phal a ni lo," a ti.

Aizawlah kum tling lo lirthei khalh hmuh tur an awm fo tih tarlangin Traffic SP chuan, "Chêtsualna pawh a thleng fo. Rilru leh taksaa la puitling lo (kum 18 tling lo)-a lirthei khalh hi a khalhtu mai bakah, lirtheia chuang ve mi dangte tan a him lo a, kawngpui hmangtu mipui tan pawh chhiatna nasa tak a thlen thei," a ti a; kum tling loa lirthei khalh man a nih chuan inhriatthiamna awm loin dan anga hmalak a nih tur thu a tarlang.

Traffic SP chuan, kum tling loa lirthei khalh hriate chu Traffic Station phone number 0389-2322307/ 9366553559-ah emaw, police station hnai berah emaw hriattir turin mipui a ngen a ni.