Manipur tualchhung buaina vanga thite tawrhpui thu CM Zorama'n a tichhuak

Chief minister Zoramthanga chuan, Manipur tualchhung buaina vanga thite leh harsatna tâwkte a tawrhpui thu nimin khan Instagram-ah a tarlang a, "Buaina chinfel dan kawng rang taka ngaihtuah leh chêt lâk nghal hi mawhphurhna la ngei ngei tura ngaihte mawhphurhna leh an tihmâkmawh a ni," a ti.

CM Zoramthanga chuan, May thla tira Manipur-a buaina chhuak chu nimin zing dar 3:30 thleng khan a la reh lo tih a tarlang a, "Ni 62-na a ni ta! Buaina a ziaawm zel kan beisei laiin a punlun ta zawk a, a reh hun tur hriatthiam harsa tak a ni tawh. Manipur buaina vanga hliam leh nunna chán te, in leh lo chánte leh buaina vanga harsatna hrang hrang tâwkte ka tawrhpui tak zet," tiin, Pathian thlamuanna leh awmpuina a dilsak thu a sawi.

Biak-in hâl leh tihchhiat te, tualthahna leh buaina nghawng tawrhna rapthlak tak tak thlalak leh video hmuh belh tur awm tawh lo se a duh thu tarlangin Zoramthanga chuan, "Buaina chinfel dan hi kawng khat chauh a awm a nih pawhin, chingfel tura hmalak nghal ni se tih hi ka duh dan a ni. Kan chipuite tawrhna chu kan tawrhna a nih avangin ngawihsan theih a ni lo. Buaina chinfel dan kawng awm apiang dapin, a rang thei ang bera ngaihtuah a ngai tak zet tawh a, loh theih loha mawhphurtute tan tun hi chêt hun ṭha ber a ni ang," a ti.

Chief Minister chuan, Manipur buaina vanga sahimna zawnga Mizorama lutte chu mi 12,000 chuang sorkarin a chhinchhiah tawh tih tarlangin, "Manipur, Myanmar leh Bangladesh aṭanga raltlan Mizoram sorkarin a tuamhlâwm leh enkawl zat hi mi 50,000 chuang an ni mek. Heng ráltlante leh sahimna zawnga Mizorama rawn tlan lut kan unaute enkawlna leh chhawmdawlna tur central sorkar aṭanga puihna kan dil pawh a rang lama pek kan nih thuai ka beisei tlat a ni," a ti bawk.