Zirlaite'n naubán enkawl dan an zir

Indian Council of Forestry Research & Education Centre, Bethlehem Vengthlangah college zirlai leh Forest Training Institute-a mite'n naubán chìn dan leh enkawl dan an zir a, vawiinah chhunzawma zawh a ni ang. Training hi Horticulture additional director L Lalhmingmawia Pachuau-in a hmanpui.

L Lalhmingmawia chuan, Mizoramah naubán chi 350 vel a awm thu a sawi a, "Heng zinga chi riat chu damdawi atan hman tlak a ni a, a ṭhen chu a rîral mai a hlauhawm vangin humhalh ṭhat a ngai hle. Nauban zingah Senhri chu Mizoram state flower a ni a, nauban kan ngainatzia a lang," a ti.

Naubán rîral mai tur humhalh a, a chìn pun kawngah EFCC leh Horticulture department chu ṭangho tlat tur an nih thu sawiin Lalhmingmawia chuan, PUC-ah naubán huan siam a nih thu a sawi a; Maubuangah Rural Development department-in Orchid Centre an din thu a sawi bawk.

ICFRE-ah hian naubán leh mau tissue culture hmangin an siam pung mek a, nauban ṭhenkhat chu a nihna tura dah theih a awm nual tawh a ni.