Mamitah sorkar laipui hmalakna sawiho

Mamit District Development Coordination & Monitoring Committee (DISHA) chu an chairman C Lalrosanga, Lok Sabha MP kaihhruaiin nimin khan DC conference hall-ah an ṭhu a; sorkar laipui scheme hnuaia hmalakna leh hmachhawpte sawihoin, harsatna an neihte chu bawhzui turin thuneitu sang zawkah thlen ni se, an ti.

Ṭhutkhawma tarlan danin, Mamit district-ah MGNREGS hnuaia job card nei mi 22,340 a awm a; kum 2022-23 chhungin ni 100 inhlawhna siam a ni. Sorkar kum kal mek 2023-24 chhungin Reiek RD Block leh Zawlnuam RD block-ah ni 14, West Phaileng RD Block-ah ni 15 leh Kawrtethawveng RD Block-ah ni 13 inhlawhna siam a ni tawh.

Jal Jeevan Mission hnuaiah khaw 91-a chhungkaw 18,171 hnenah tui connection pek a ni a; PMGSY hnuaia kawng siamah Phuldungsei-Parvatui kawng 75%, Tuipuibari-Andermanik kawng 95% leh Andermanik-N Belkhai kawng 40% thawh zawh tawh a ni.

National Health Mission hnuaiah khaw 90-a cheng mihring 1,00,867 tuam mek a ni a; Samagra Shiksha hnuaia Quality Intervention 2022-23 kaltlangin sikul pariatah vocational education a kalpui mek a ni. PMUY hnuaiah LPG connection-ah 5,840 pek a ni tawh bawk.

Ṭhutkhawmah hian Mamit district-a MLA pahnih Lalrintluanga Sailo (Dampa) leh H Lalzirliana (Mamit) te, bawrhsap VL Remliana leh DISHA member te, khawtlang leh tlawmngai pawl aiawhte an tel a ni.