Tribal art & craft inzirtirna khâr a ni

Social Welfare & Tribal Affairs (SWTA) minister Lalrinawma chuan nimin khan Aijal Club-ah SWTA department leh Aizawl Art Gallery buatsaih ‘Tribal Art & Craft, Young Artist’s Sustainable Development’ khârna hun a hmanpui a, a ti ṭhate hnenah lawmman a sem.

SWTA Minister chuan, art tih chuan lemziak bakah thu leh hla te, rimawi leh hnam ziaráng thlengin a huam thu sawiin, "Mizo khawtlang nunah zai leh hla bakah, rimawite'n dinhmun sang tak a chang a, kan ngaihluin kan rilru a hneh hle. Ṭhangtharte zingah Mizo pi pu thawnthu zirtir ṭha tak tak neite hria leh chhiar an tlem hlein ka hria. Kan pi pute thawnthu kha a ropui a, ṭhalai leh ṭhangtharte'n kan hlut a ṭul," a ti.

He hunah hian lemziak leh kut themthiamna hmanga siam (craft) lama ti ṭha mi pathum hnenah lawmman sem a ni a; vohbik lemziak thiam RL Thanmawia hnenah Vohbik Award hlan a ni.

Tribal Art & Craft, Young Artist’s Sustainable Development hi Ministry of Tribal Affairs bul tuma neih ṭhin a ni a, kuminah hian ṭhalai, art lama tui mi 67 an inziak lut a, thla khat chhungin art lama mithiamte'n enkawlin thil pawimawhte an inzirtir a ni.