Manipur-a Zo hnahthlakte chu nuai bo tuma beih mek an ni - ZORO
Zo Reunification Organization (ZORO) chuan nimin khan thuchhuah siamin, Manipur-a Zo hnahthlakte chu nuaibo tuma beih mek an nih thu leh, Zo fate'n an dam khawchhuahna tura an beihna leh rorelna hran nei tura India sorkar an ngenna chu an thlàwp thu an tarlang.
ZORO chuan, "Manipur-in a awp mek Zo fate hnam anga nuaibo an tum mekna aṭanga dam khawchhuak tura an beihnaah leh Manipur rorelna laka la hrang tura India sorkar an ngen mek hi kan thláwp. Khawvel hmun hrang hranga Zo fate hian tuna Manipur state-a Zo fate beihna hi an thláwp reng dawn tih kan chiang a, hetiang thlàwpna an hmu thei hi lawmawm kan ti hle," an ti a; ṭangrual zel turin Zo hnahthlakte an chah.
ZORO TARLAN DANGTE
▶ Thla hnih kal ta chhung khan Zo fate leh Meitei an inṭhen fel thlap tawh. Rilruah an inpawh lo mai ni loin, an inhlat tial tial a, engkimah ramri a inkham fel ta a ni ber a, inremna kawng hawi turin hmalak ngaihna a la awm thei lo. Hei hian Zo fate leh Meitei te ram inrêlbàwlna pakhat hnuaia dah khawm reng tum chu thil theih a ni lo tih a tichiang.
▶ Meitei Chief Minister leh a thawhpui minister leh party lama mite, Meitei khawtlang hruaitute thusawi aṭangin Zo fate leh Meitei te hi inrema chenho an duh lo. A chhe thei ang bera puhin an ram va chuhpuitu leh dan loa pêm lut tia dâwta puhin nuai chimih an tum chhunzawm zel.
▶ Manipur sorkar, police leh civil lam Meitei thuhnuaiah vek an awm a, inthup loin Zo fate nasa takin an bei mawlh mawlh.
▶ Dan mumal a awm lo a, thil nihphung a buai vek. Hmun hrang hrang aṭangin India sorkar hian thuneihna la mai se tia rawtna a awm reng chungin Biren Singh kaihhruai sorkar a la ding tlat a, Meitei mipui pawhin an thláwp tlat. Zo fate tan Meitei nena rorelna inṭâwm a beidawnthlakzia a tilang chiang hle.
▶ Meitei ho nunrâwng takin an che a, David Thiek (Hmar) lú an tan a, biak-in bula an tár leh a taksa chan sawma diriamna hleihluaka an sawisa hi Zo fate'n engtikah mah an theihnghilh tawh dawn lo. Chuvangin, Meitei leh Zo fate hi sorkar pakhat hnuaia awmho thei kan ni tawh lo.