Champhaiah TrueNAT lab. hawn a ni

September 29-a ZMC Covid-19 laboratory-a hripui vei hmuh chhuah mi 13-te chu mipa 12 leh hmeichhia pakhat, Aizawl district-ah September 26 leh 28-a swab sample lakte an ni a; an zinga mi pathum - Zuangtuia hmeichhia kum 41 mi leh Ṭhuampuia mipa pahnih kum 22 leh 25-te chu Mizoram chhunga kái chhâwng (local positive contact) an ni.

ZMC-a hmuh chhuah dang 10-te chu state páwn aṭanga tun hnaia rawn lut an ni thung a, chu'ng zinga pasarih chu Zokhawsang quarantine facility-a khung hran mek Assam Rifles sipai an ni. Agape centre QF-a awm mek BSF sipai pakhat kum 52 mi te, Assam Regiment-a Mizo sipai pakhat, Mamit district-a cheng, tun hnaia Assam aṭanga rawn haw, Agape Centre QF-a awm mek leh, Bawngkawn venga mipa (civilian) pakhat kum 21 mi, tun hnaia Assam aṭanga rawn lutte an tel bawk.

Nilaini vêk khan Champhai District Hospital-ah TrueNAT-PCR hmangin hripui vei mipa kum 23 mi, tun hnaia Silchar aṭanga rawn lut hmuh chhuah a ni a; Serchhip District Hospital-ah pawh TrueNAT-PCR hmang vêkin BSF sipai pakhat, kum 40 mi hmuh a ni.

RAT hmangin Aizawlah BSF sipai kum 54-a upa, Ṭhuampui venga cheng chuan hripui a vei tih hmuh chhuah a ni a, Covid-19 symptom a neih vanga endik a ni. RAT hmang vekin Lungleiah BSF sipai pahnih leh Serchhipah BSF sipai 10 hmuh chhuah a ni bawk.

September 29 khan Mizoramah mi 1,515-te swab sample endik a ni a; ZMC-ah 662, TrueNAT-PCR hmangin district parukah mi 108 leh RAT hmangin district pakuaah mi 745-te sample endik a ni.