NH laih leh turah environment dan zâwm tawh turin NHIDCL an phût

5th July, 2023

Centre for Environment & Social Justice (CESJ) chuan nimin khan Aijal Club-ah national highway (NH) kawngpui laihin ramngaw, thing leh mau, nungchate a tihchhiat dan zirhona an buatsaih. Kawngpui laih leh turah environment dan leh hrai zâwm chunga hna thawk turin NHIDCL an phût tih an tarlang.

Sawihonaah hian Dr Vanramliana'n zirhona buatsaih chhan a sawi a, social worker Vanramchhuangi'n NH-06 kawngpui laihin environment a tihchhiat dante a sawifiah. NHIDCL aiawhten NH-306 Vairengte-Sairang kawng laih zauh tura hma an lâk dan leh an inruahman dante an sawi bawk.

CESJ chuan thuchhuah siamin, hmasawnna hna thawh chu an dodal lo a, an lawm hle tih an tarlan rualin, environment humhim chunga thawh ni se an duh tih an tarlang a, "NH-306 laih leh turah environment dan leh hrai zawng zawng zâwm chunga hnathawk turin NHIDCL kan phût a ni," an ti a; nimina sawihonaah sawifiah turin NHIDCL-te an sàwm thu an tarlang.

Mizorama NH kawngpui hrang hrang laitu National Highway Infrastructure Development Corporation Limited (NHIDCL)-in environment pawisakna nei loin nasa takin Mizoram environment an tichhia tih CESJ chuan an tarlang a, "Dan zâwm loa an leivûng paihin environment an tihchhiat zozai hi a nasa hle a, tunah hian Mizoram hmun tinah a nghawng kan tuar lêt mek a ni," an ti.

CESJ tarlan danin, NHIDCL-in kawng an laih NH-54 (Aizawl-Tuipang), NH-06 (Seling-Zokhawthar), NH-102B (Keifang-Manipur) leh NH-302 (Lunglei-Tlabung) leh, Mizoram PWD-in kawng an laih NH-44A (Lengpui-Langkaih)-ahte leivûng paih danah nasa takin dàn palzût a ni.

NH-54 (Aizawl-Tuipang) kawng laih chungchang bikah CESJ chu National Green Tribunal (NGT)-ah an zualko a, April 20, 2023 khan hearing hmasa ber neih a ni a; NHIDCL-te'n environment dan an bawhchhiat vanga district forest officer-te'n stay order an pek tawh chu enfiaha zâwm turin NGT chuan state sorkar a hriattir.

CESJ chuan, NH-306 (Vairengte-Sihhmui/Sairang) kawngpui zauh tum mek a nih thu tarlangin, environment dan leh hraite ṭha taka zawm tawh turin kawng laitu turte an phût a ni.