KHAWTHLIR

Bengdár pe chhuak

MLA VL Zaithanzama hmalaknain nimin aṭang khan a bial, Aizawl West-III huam chhunga ri hriatna lama harsatna nei tan beng entirna, Hearing Aid Clinic buatsaih a ni a, mi 120 tan nimin aṭang khan Redeem Hearing Aid-ah a tahtawlin bengdár pek ṭan a ni.

Accreditation card

Information & Public Relations deputy director K Saitluanga chuan nimin khan Serchhip Press Club-ah Serchhip district-a accredited journalist mi 12 hnenah accreditation card a hlan. Accreditation card hi March 31, 2025 thleng nung tur a ni a, Mizorama journalist mi 140 hnenah pek a ni.

Lirthei rit khap

Mamit SP Lalthangpuii Pulamte chuan Bairabi-Zamuang kawnga Teirei lei (bridge) siamṭhat chu lirthei metric ton 15 aia rit phur tan zawh khap a nih thu leh darkar khatah km. 10 aia chaka tlân phal a nih loh thu a tarlang. Thupek bawhchhiate chu MV Act Section 179 hmanga hrem theih an nih thu a tarlang bawk.

Hman dan tur rel

Kolasib District Sports Committee chu nimin khan an chairman John LT Sanga, bawrhsap hoin DC conference hall-ah an ṭhu a, Kolasib district-a infiamna chi hrang hrang tihhmasawnna tur, Promotional Fund Rs 2,24,400 sem dan tur an sawiho. KDSC-ah hian kum 2023-24 atan infiamna kaihhnawih pawl 19 an inziak lut a ni.

MZU UG result

Mizoram University chuan June 6, 2023 (Ningani) hian under graduate semester II, IV leh VI result a tichhuak dawn. Result hi http://mzuegov.in/onlineresult... registration number chhu lutin en theih a ni ang.