Kuminah inhlawhna ni 62 siam tawh

Rural Development minisrter Lalruatkima chuan nimin khan Dinthar YMA Hall-ah Aizawl West-II chhunga veng paruka mite tan puanṭhui kháwl 105 a sem a; Mizoramah MGNREGS hnuaiah job card 2,01,107 a awm thu leh kuminah inhlawhna ni 62 siam a nih tawh thu a sawi.

Lalruatkima chuan, sorkar laipui aṭangin kum 2020-21 ah April aṭanga September 29 thlengin MGNREGS hnuaia ni 100 inhlawhna (wages) sum dawn tawh zat chu nuai 27907.90 a nih thu a sawi a, "Chawhrualin, job card holder zawng zawngte inhlawhna ni 62 ṭheuh siamsak tawh a ni," a ti. Job card neitu pakhatin ni khatah Rs. 225 an hlawh thu a sawi bawk.

Minister sawi danin, Septemnber 25, 2020 khan thingtlanga mirethei in sak ṭanpuina cheng nuai 621.27 (central share nuai 500 leh state share nuai 121.274) chu Finance department-in RD department hnenah a pe a; chu chuan thingtlanga chhungkaw 2,754-te in sak chhunzawmna tur a daih dawn a ni.