College sak danah lungawi lo

Aizawl North-II bialtu MLA Dr Vanlalthlana leh AMC Ward-III corporator C Lalchhandami te chuan nimin khan an bial chhunga Aizawl North College (ANC) sak mek an tlawh a; college sak danah thil fel tâwk lo a awma an hriat avangin an lungawi lo hle nia tarlan a ni.

ZPM thuchhuah tarlan danin, ANC zauhna tur sak mek chu October 2019-a sak ṭan, November 2022-a zawh tur a ni a, a sakna atan Rashtriya Uchchatar Shiksha Abhiyan (RUSA) aṭangin cheng nuai 150 ruahman a ni. In satu Skyridge Construction & Consultancy Services-in Rs 21,37,00,000 hû work order an hmuh angin an sa a ni.

Dr Vanlalthlana leh C Lalchhandami te hian ANC building sak dan chu duhthu a sâm lo a, sak a nih danah thil fel tâwk lo awmin an hria a, an lungawi lo hle niin ZPM chuan an tarlang.

MLA leh Corporator-te chuan, a nihna tur anga hna thawh a ni lo leh thawh zawh hun tura ruatah zawh a ni lo chu an ngaimawh thu leh, hna an thawh muan vanga zirlaite'n zirna an bahlah phah chu pawi an tih thu an sawi. Hna la thawh zawh lohte chu a rang thei ang bera thawk zo a, zirlaite hma lam hun thui tak an kutah a awm a ni tih inhria a, zirna-in ṭha leh zahawm tak a awm theih nan hna thawk turin thawktute an chah a ni.