KHAWTHLIR

Aizawl Civil Hospital (ACH)-a Medicine department OPD-ah Covid-19 vei sipai pakhat a inentir avangin ACH OPD chu nimin khan khâr a ni. Thu dawn danin, sipai pakhat chu Covid-19 natna lan chhuah dan (symptom) a neih avangin nimin zing khan Serchhip aṭanga Aizawla hruai niin, ACH Medicine OPD-ah hruai a ni a; Rapid Antigen Test hmangin a aswab sample endiknaah Covid-19 positive a ni tih hmuh a ni. OPD hi vawiinah an hawng leh nghal dawn nia thu dawn a ni.

Penticostal Youth Department (NEI)-in September 28 aṭanga Blood Donation Week an hman mekah nimin khan thisen an pe chhunzawm a, mipa 60 leh hmeichhia 11-te'n Aizawl Civil Hospital tan thisen unit 71 an pe. PYD-te hian Blood Donation Week an hman mekah September 28 khan thisen unit 72 leh September 29 khan unit 68 an lo pe tawh a, vawiinah an pe chhunzawm leh ang.

Health & Family Welfare Board vice chairman Dr ZR Thiamsanga, MLA chuan nimin khan Ministry of Child Development leh Social Welfare department kaltlanga Champhai Vengsanga One Stop Centre (OSC) building thar a hawng. OSC hi hmeichhe baihvàite tluk luhna leh awm lailâwkna hmun a ni a; Champhaia OSC hawn tâkah hian pindan pathumah khum panga a awm a, counselling room, video conferencing room leh staff room a awm bawk.

Nimin khan Mamit District Level Committee on Cleanliness Com­petition and Cleanliness Week chu an chairman, DC Dr Lalrozama hoin DC conference hall-ah an ṭhukhawm a, kuminah Faina Hapta zing dar 8-a DC office complex-ah hman leh veng fai leh pisa fai ber thlan an rel.

State Referral Hospital (ZMC)-ah Covid-19 vei vanga enkawl mi 13 chiah an awm ta. ZMC-SRH Bulletin tarlan danin, nimin khan Covid-19 vei mi pali dah luh an ni a, chu'ngte nen chuan mi 13 awm mekin, mi pathum chu ICU-ah an awm. Mi 13-te zingah ngaihtuahawm lutuk an awm lo.