Blood bank-ah CSS hnuaia thawk an tam; Thisen pek leh lâkah an ṭangkai hle

Mizoram sorkar, Health & Family Welfare department hnuaiah blood centre/bank pakua a awm a, chu'ngah chuan a ngheta thawk (regular employee) aiin a nghet loa thawk an tam zawk. Blood centre-te tluang tak leh ṭha taka a kal theih nan leh thisen ma­mawhte'n thisen an dawn theih nan CSS hnuaia thawk (a nghet loa thawk)-te an pawimawh hle.

RTI Act tlawhchhana zawhna Health & Family Welfare department SPIO-in June 28, 2023-a a chhan danin, Mizoram sorkar blood centre pakuaah thawktu mi 67 an awm a, chu'ng zinga a tam zawk - mi 36 chu a nghet loa thawk an ni a, a ngheta thawk mi 31 an awm.

Sorkara a nghet loa thawk mi 36-te chu centrally sponsored scheme (CSS) hnuaia thawk an ni a; Mizoram State AIDS Control Society (MSACS) hnuaia thawk mi 20 leh National Health Mission (NHM) hnuaia thawk mi 16 an ni.

HFW SPIO tarlan danin, Mizorama model blood bank awm chhun leh blood bank lian ber Civil Hospital, Aizawl Blood Centre-ah thawktu 24 an awm a, chu'ng zinga 10 chu a ngheta thawk an nih laiin, mi 14 chu a nghet loa thawk (MSACS hnuaia mi pariat leh NHM hnuaia mi paruk) an ni. Thu dawn danin, Civil Hospital Blood Centre-ah hian thisen latu (bleed-tu) laboratory technician 20 vel an awm a, chu'ng zingah chuan a ngheta thawk mi pathum chiah an awm.

Mizorama blood centre hrang hrangah a ngheta thawk aiin a nghet loa thawk an tam zawk deuh vek a, a ngheta thawk leh a nghet loa thawk inzatna blood centre pakhat a awm. Lawngtlai District Hospital Blood Centre-ah chuan thawktu pasarih awm zingah pakhat chiah a ngheta thawk a awm a, a bak mi paruk chu a nghet loa thawk a; NHM leh MSACS hnuaia mi vek an ni.

Hetih lai hian, blood bank tharlám ber Zoram Medical College / State Referral Hospital Blood Centre-a thawktu mi 11-te chu a ngheta thawk vek an nih thu SPIO chuan a tarlang.