Mizoram thingtlang khaw 89%-ah tui connection pek a ni tawh

Public Health Engi­neering department-a Project Management Unit chuan nimin khan Vanapa Hall-ah Aizawla tui sem tihchangtlun dan tur zirhona, 'Workshop on Water Management for Aizawl City - Status, Chal­lenges & Way Forward' an buatsaih. Mizorama thingtlang khaw 89%-ah tui connection pek a ni tawh tih tarlan a ni.

Zirhonaa tarlan danin, Mizorama thingtlang khua zinga 89%-ah tui connection pek a ni tawh a, zirna-in zinga 80%-ah leh anganwadi 97%-ah tui connection pek tawh a nih bakah, khawpui (urban town) 28-ah tui hnianghnar taka pek a ni tawh.

Aizawl bikah, tun dinhmunah mipui kham­khawp tui pump theih a ni rih lo. Aizawl khawpuiah PHE department hnuaiah tui pump-tu mi 79 leh tui semtu mi 433 an awm.

Zirhona hmanpuitu PHE enkawltu deputy chief minister Tawnluia chuan, PHE depart­ment-a thawkte chu mipui nena inhnîmhnai tak an nih avangin hawiher leh ṭawngkam thlenga fimkhur a ṭul thu a sawi.

PHE Minster chuan, thingtlang khua zawng zawngin tui thianghlim tlan tur an neih theih nan sorkar laipui rua­hmannain hmalak mek a nih thu sawiin, "Kum 2019-a ṭan Jal Jeevan Mission hnuaiah khua zawng zawnga in tinah a thlawnin tui connection pek kan tum a, chenna in target 1,33,060 chuang zinga 1,18,500-ah tui connection pek a ni tawh a, hmabak 14,460 vel hi kumin December ral hmain pek zawh kan tum," a ti.

Department-a thawkte'n theihtawp an chhuah avangin Mizoram chu JJM-ah India rama state ti ṭha ber zinga mi a nih thu sawiin Tawnluia chuan, "State dangte'n an target an zawh hun tur pawhsei an dil laiin, keini chu a hun tawp hmain zo thei turin ṭan la rawh u, ti khawpin min fuih hi a lawmawm tak zet," a ti a; tuihna humhalh lamah ṭan lak nasat a ṭul thu a sawi bawk.

PHE secretary C Lalremsiama pawhin thu sawiin, Aizawl khawpuiah Mizorama mihring awm zawng zawng zinga 28% vel an chèn avangin tui thianghlim pekah hma a zau bik tih a sawi a, "Aizawl châwm zo khawp tui kan la pump thei rih lo a, tuna SIPMIU hmalakna hi a hlawhtlin chuan hnianghnar taka Aizawl châwm thei tur tui kan pump thei ang," a ti.

Zirhonaah hian Aizawla tui semtu leh enkawltute an tel a; Mizoram Consumers' Union vice president C Laldawngliana leh Synod Social Front coordinator H Lalhmingmawia te pawhin thu an sawi.