Thuneitute'n naupang dikna leh chanvo humhalhnaa thawhho dan tur an sawiho

Mizoram State Commission for Protection of Child Rights (MSCPCR) leh Child Welfare Committee (CWC) hotute chuan July 4, Thawhlehni khan District & Session Judge, Aizawl leh Fast Track Special Court (POCSO Act) an tlawh a; Mizorama naupangte dikna leh chanvo humhalhnaah thawhhona ṭha an neih dan tur an sawipui.

District & Session Judge tlawhtute hi MSCPCR aṭangin chairman Dr C Lalsangzuala leh member pahnih - Dr Julie Remsangpuii Fambawl leh K Malsawmzuali bakah, secretary Lalengvari, superintendent Lallianzuala Chawngthak, legal officer Priscilla Lallawmsangi leh counsellor Francis Lalṭhaenga te an ni a; Aizawl district CWC aṭangin member K Lalremruati a ni. District & Sessions judge Vanlalenmawia’n a lo dawngsawng.

MSCPCR chu danin thuneihna a pek angin Protection of Children from Sexual Offences (POCSO) Act leh a kaihhnawihte kenkawhnaah thuneihna nei a nih thu leh, hleilenna leh hursualna tuartu naupangte'n harsatna chi hrang hrang an tawh ṭhinte MSCPCR hotute chuan District & Sessions Judge an sawipui a ni.

MSCPCR hotute chuan, internet social media-a naupang hming, nihna leh thlalakte tarlan a ni leh ṭhin chu pawi an tih thu sawiin, POCSO Act kalh a nih avangin a titute hrem theih an nih thu an sawi a; court aṭanga chanchinbumi leh mi náwlpui hriat tur pek chhuahnaah uluk taka thlitfim hmasak ṭhin ni se an duh thu leh, POCSO Act thubuai la chin fel lohte chu court-in chak zawkin chingfel se an duh thu an tarlang.

District & Sessions judge Vanlalenmawia chuan, Aizawl District Court-a POCSO Act hnuaia pawikhawihna tuartu naupang leh nuin thubuai vanga court-a naupang an lo hruai telte buaipui tu tur child welfare officer/probation officer ṭhutna tur hmun an pek theih tur thu a sawi.

Inkawmnaah hian POCSO Act Victim Compensation Scheme chungchang sawi lan a ni a, pawikhawihna tuartu naupangte'n a hun takah zangnadawmna an dawn theihna turin theihtawpa hmalakho ni se, an ti. POCSO Act hnuaia thubuai ziah luhte ngaihtuahna court room-te leh hmanrua/bungrua (one-sided mirror)-te an enfiah nghal bawk.

Inkawmhonaah hian Aizawl District Court aṭangin Fast Track Special Court (POCSO) presiding officer P Singthanga, Fast Track Special Court (Rape & POCSO Act) presiding officer R Lalṭhazuala, special judge (PC Act) Dr HTC Lalrinchhana, chief judicial magistrate Lalrochami Ralte, civil judge H Lalduhsanga leh special public prosecutor (POCSO) Rosemary te pawh an tel a ni.