Minister-in YMA jubilee a hmanpui

YMA, Dinthar Branch chuan nimin khan an veng YMA Hall-ah an din champha vawi 50-na, golden jubilee an lawm a, bialtu MLA Lalruatkima, minister-in a hmanpui.

Minister chuan, "YMA chu political party, kohhran leh pawl hrang hrangte an luan khawmna, pawl ropui a ni. He pawla telte hian kan khawtlang chhiat leh ṭhatah mawh kan phur a, YMA hi Mizo hnam humhimtu, kan hnam darthlalang a ni," a ti a; tlawmngaihna leh rinawmna vawng nung zel tur leh ram leh hnam hmasawn nana thawk zel turin kal khawmte a sáwm.

Jubilee lawmnaah hian Central YMA president R Lalngheta, MLA pahnih Lalrinsanga Ralte leh K Laldawngliana leh, Aizawl deputy mayor R Thanglura te pawh an tel a; hruaitu hlui mi 79 hnenah lawmpuina thilpek hlan a ni.

YMA, Dinthar Branch hi July 5, 1973-ah Dawrpui Vengthar aṭangin a indang a, member 3,409 an awm mek. Jubilee pualin Civil Hospital, Aizawlah thisen unit 119 an pe a, veng chhung mipui tan intihhlimna hrang hrang an buatsaih bawk.