India-MNF inremna Article 371G hi UCC laka kan himna tur a ni lo - MPCC

Mizoram Pradesh Congress Committee (MPCC) hruaitute chuan nimin khan Congress Bhavan-ah thuthar thehdarhtute an kâwm a; Uniform Civil Code (UCC) an dodal thu sawiin, "MNF leh India sorkar inremna Article 371G hi UCC laka kan himna tur a ni lo," an ti.

MPCC thupuangtu Ronald Sapa Tlau chuan, UCC chu Parliament session leha put luh tum a nih thu Prime Minister-in kar khat liam taah a puan thu sawiin, "India mipui tam zawk tana thu lawmawm a nih theih laiin, hnam tênau leh sakhaw tê zawk tam tak tan thu thinṭhâwng a ni. Mizo hnam, Kristiante tan ngei pawh kan hnam nunphung (culture), sakhua leh ni tin nun min ṭhiahsaktu leh kan hnam ziaráng bo ṭhak khawpa min nghawng tur a nih avangin Mizo Kristiante rûmin min siam ta a ni," a ti.

Ronald Sapa chuan, India Constitution-a Article 371G chu Mizoram tan special provision a nih avangin, mi ṭhenkhatin Parliament-in UCC pawm mah se, Mizoram Legislative Assembly-in a pawm ve loh chuan Mizoramah hman theih a ni lo anga an sawi thu a sawi a, "UCC hi Parliament-ah Kashmir special status tia an chhuan em em pawh kum 2019-a BJP sorkarin Kashmir state a ṭhiat a, a bo nghal," a ti a; Mizo hnam leh sakhua humhim turin a tawp thlenga UCC do a ṭul thu a sawi.

MPCC Spokesperson sawi danin, India Constitution-in mimal zalenna chungchang chiang takin a tarlang a; Constitution duangtu Ambedkar chuan, 'Mi tu mahin an thuneihna hmangin mi dang an nêk emaw, nawr tur emaw a ni lo,' tiin a sawi a ni.

UCC chu India ram inpumkhatna tichhe theitu tur leh hnam tênau leh sakhaw tê zawkte rahbehna leh inchîmralna hmanraw hlauhawm a nih avangin a tàwp thlenga dodal tlat a ngai tih chu Congress party ngaihdan a nih thu sawiin Ronald Sapa chuan, "Hemi chungchang India mipuiin an ngaihdan Law Commission of India-a thlen theih hun chhungin MKHC-in ṭhahnem ngai taka party tinte a ngen ang ngeiin kan president Pu Lalsawta chuan a remchan veleh dodalna thu a thlen dawn," a ti.

MPCC hruaitute chuan, sakhaw tênau te, hnam hnuaihnung leh tlém zawkte'n BJP sor­karna hnuaiah enhranna, dodalna leh tih­duh­dahna an tawng fo tih sawiin, "Kan mi­ssionary-te tawrhna thlentu, kan biak-in min hâlsaktu leh ringtu tam tak tiduhdaha that mektu an ni tih khawvelin min hriatpui," an ti a; UCC dodalnaa thawhpuiah Mizo mipui an sáwm a ni.