MPCC leh AICC hruaitute an inkâwm

June 4, Thawhlehni khan Mizoram Pradesh Congress Committee (MPCC) hruaitute leh All India Congress Committee (AICC) chu AICC Office, New Delhi-ah an ṭhukhawm a, Mizoram inthlanpui awm tur chungchang leh hmalak dan turte an sawiho.

MPCC thuchhuah tarlan danin, inkawmhona hi AICC president Mallikarjun Kharge-a'n a kaihruai a; M Kharge chuan, kum 2024-a Parliament inthlanpuiah BJP sorkarna titawp turin Mizoram inthlan a pawimawh thu sawiin, kumina state hrang hrang assembly inthlan turah Congress party an chak ngei a beisei thu a sawi. Mizoramah pawh Congress party an chak ngei theih nan theihtawp an chhuah dawn thu a sawi bawk.

MPCC president Lalsawta chuan, Mizoramah BJP hmanrua ni thei lo awm chhun chu Congress party chiah an nia sawiin, "India ramah sakhaw zalenna tundin a nih zel theihna turin Mizoram mipuite'n Congress sorkar an nghakhlel hle a ni," a ti.

Lalsawta chuan, Mizoramah kum nga chhung MNF-in ro an rèl chhungin state economy a tlahniam nia sawiin, "Sum leh pai dinhmun a chhe em em a, mipui an mangang," a ti a; ZPM party chu anmahni leh anmahni an intihchhiat avangin sorkar turin mipuiin Congress party-ah beiseina sang tak an nei niin a sawi.

Rahul Gandhi pawhin thu sawiin, India hmarchhak state zingah Mizoram chu Congress party ṭhatna ber a nih thu a sawi a, "Kum 2024-a India ram inthlanpui awm turah Congress party-in sorkarna a chan theihna tura a hmahruaitu atan Mizoram inthlan a pawimawh," tiin, Mizo mipui hmu turin Mizorama kal ngei a tum thu a sawi.

Ṭhutkhawmah hian MPCC aṭangin president Lalsawta bakah, treasurer Dr Lalmalsawma Nghaka, thupuangtu Dr Lallian-chhunga, general secretary CS Thanga, Mahila president Vanlalawmpuii Chawngthu leh MPYCC president Laltawnliana Sailo te an tel a ni.