DMR minister Chama'n leimin a tlawh

Disaster Management and Rehabilitation (DMR) minister Lalchamliana chuan nimin khan tun hnaia Vaivakawna lei minna hmun a tlawh a; State Disaster Response Fund hnuaia Gratuitous Relief aṭangin chhungkaw panga hnenah chhawmdawlna sum a hlan.

Lalchamliana chuan, Vaivakawna leiminah tun din­hmunah ruahmanna zawng zawng siam nghal a rem loh avangin a kaihhnawih depart­ment-te nen July 7, 2023-ah an inhmu khawm dawn tih a sawi a, "Ruahmanna leh hmalak dan tur felfai zawk rêl a ni ang. Sorkarin khuarel chhiatna atan pawisa dah lâwk nei mah se, leimin hian a awh zau tham avang leh a nghawng chhungkaw ṭhahnem tak an awm avangin National Disaster Management Authority-a thlen turin ruahman a ni," a ti.

DMR Minister hi DMR secretary Lalrinzuali leh Aizawl bawrhsap Dr Lalhriatzuali Ralte bakah, PWD, DMR leh a kaih­hnawih department hotute'n an ṭawiawm a; DMR department aṭangin Vaivakawn LC hnenah pawisa leh tarpauline a pek bakah, State Disaster Response Fund hnuaia Gratuitous Relief aṭangin chhungkaw panga hnenah pawisa a hlan a ni.

Vaivakawn LC hruaitute tarlan danin, an venga tun hnaia lei khi leh min avangin chhungkaw 16-in an in an chhuahsan tawh a, in pakhat ṭhiah tawh niin, in panga luah ngam lohin a awm mek a ni.