Kawngpui laihna leivung paih vangin Zawlpui leiletah harsatna an tâwk

Agriculture minister C Lalrinsanga chuan nimin khan Serchhip Zawlpui leilet a tlawh a, kut hna­thawktute nen an inkâwm. Leilet neitute chuan, kawngpui laihna lei­vung paih vangin harsatna an tawh thu an lo hrilh a; Minister chuan, leivûng paihin leilet tui kawng a hnawh pin chu hmasawnna vanga harsatna a nih thu a sawi.

Leilet neitute chuan Agriculture Minister hnenah hian an harsatnate an lo thlen a; khuarel chhiatna ni lo, kawng laitute'n leivûng an paih avangin Tuilut, Lumtui leh Zawlpuia an tui laknaah harsatna an tawh thu an sawi. Kawng laitu company leh contractor ten harsatna an siam avangin Serchhip DC leh Serchhip Police Station-ah an thlen tawh ṭhin thu an lo hrilh a ni.

C Lalrinsanga chuan, Serchhip chu Mizorama kut hnathawktute'n thlai an thar chhuah tamna a nih avangin sorkarin a ngaih pawimawh thu sawiin, "Tuna leivûng paihin leilet tuikawng a hnawh pin hi hmasawnna vanga harsatna a ni. Kan ram neihte hi a zím a, kan neih ang ang kan humhalh ṭhat a ngai a, in harsatna hi company lama hotute biain theihtawp ka lo chhuahpui ang che u," a ti.

Kawng siam vanga harsatna an tawhte chu eng emaw chenah an hriat­thiam a ṭul thu sawiin C Lalrinsanga chuan, "A vèn hna erawh nangni pawhin theihtawp lo chhuah zel u la. Kawng laitute hi NHIDCL hnuaia contractor-te'n an lâk chhàwn a ni a, Mizoramah hna tam tak an thawk mek a, kan lui dung leh khawimaw lai laiah leivûng paih vanga harsatna hi thleng zel thei a ni tih lo hria ang che u," a ti a; leileta tui kawng siam chu tihtawp a, solar pump hmanga tui lâk sorkarin a ngai pawimawh niin a sawi.

Agriculture Minister chuan Serchhipah kut hnathawktute thar chhuah dahṭhatna tur cold storage dah thuai tum a nih thu a sawi a; leilet záwlah sangha dil siam phal a nih loh thu te, collective farming system kalpuina tur Cabinet-in a pass thu leh farmer producer organisation din zel a nih tur thu te, leiletah kum khata vawi thum thar thei sum chang thlai chìn chu sorkar hmachhawp a nih thute sawi bawk.

Minister C Lalrinsanga hi Serchhip biala MNF candidate ni tura puan tawh J Malsawmzuala Vanchhawng-in a ṭawiawm a ni.