KHAWTHLIR

Raltlan puihna pe

KVM High School chuan sikul golden jubilee lawmna pualin nimin khan Manipur ráltlânte puih nan Rs 20,000 an thawh. Ṭanpuina sum hi KVM H/S aiawhin School Education minister Lalchhandama Ralte-in chief minister Zoramthanga hnenah a hlan a ni.

Vote thlak zirna

Lunglei District Election office chuan nimin khan DC pisaa Election Branch-ah voter identity card nei thar leh nei tawhte tan kumina MLA inthlanpui neih tura inbuatsaihna pakhat atan electronic voting machine hmanga vote thlak zirna, EVM Demonstration Centre a hawng.

Raltlan buaipuitu din turin hriattir

Mamit bawrhsap VL Remliana chuan Manipur buaina vanga sahimna zawnga Mizorama lutte buaipui turin Mamit district-a VC-tinte chu an khua/veng ṭheuhah Village Level Committee on Internally Displaced Persons (IDP) din turin a hriattir.

Bawlhhlawh paih khapna thupek

Lunglei addl. DC Donny Lalruatsanga chuan, Lunglei khawpuia veng hrang hrang kawng dungah bawlhhlawh paihna hmun ni loah bawlhhlawh paih ṭhin a ni tih a tarlang a, 'UDPA emaw VC-te'n bawlhhlawh paihna atana hmun an ruatah chauh bawlhhlawh paih tawh tur a ni," a ti.

Hnathawh thlir let

Serchhip district bawrhsap Nazuk Kumar hoin nimin khan DC meeting hall-ah Serchhip district-a Swatch Bharat Missions (Grameen) leh Jal Jeevan Missions hmalaknate thlir lêt a ni a, District Water and Sanitation Missions member-te leh mi pawi­mawh dangte an tel.

Cyber security zir

Lunglei SP leh NIELIT chuan July 4, Thawhlehni khan Pukpuia NIELIT hmunah Lunglei police, BSF leh DC pisaa thawkte tan Microsoft Excel leh cyber security chungchang inzirtirna an buatsaih a, mi 47 an tel. Training hi MLA inthlanpui awm tura inbuatsaihna atan dan kengkawhtute leh office staff-te'n an thiamna an tihpun theihna tura buatsaih a ni.

Lei tlahniam tlawh

Lunglei additional DC Donny Lalruatsanga chuan July 4, 2023 khan Ṭhualṭhu khuaa lei tlakhniamna hmun a tlawh a, NHIDCL hotute'n an ṭawiawm. Ṭhualṭhu khawtlang hruaitute chuan, lei tlahniam chu NHIDCL-in kawng an laih vanga a nih thu an sawi. NHIDCL hotute chuan, lei tlakhniamna hmun chu a rang thei ang bera siam an tum thu leh lei tlahniamin a tihchhiat chawlhbûk leh vantlang zun-inte siam an tum thu an sawi.

Meth man

Bawngkawn Police leh Custom Division, Aizawl chuan July 4, Thawhlehni zan dar 10:15 khan Ṭhuampui Venga hotel pakhatah Lallianthanga (33) s/o Lalrindika leh David Lala (28) s/o Lallianzauva, Myanmar ve ve nia inchhalte kut aṭangin methamphetamine kg. 4.691 an man.

Lei laih khap

Aizawl Municipal Corporation (AMC) chuan Bawngkawn leh Phunchawng inkar kawngpui leh, Vaivakawn Zohnuai leh Chawlhhmun inkarah lei laih, hmunhma siam rem leh chutiang kaihhnawih hmalakna reng reng khap a nih thu a tarlang.