Police paltlang kuhva phur truck a kâng; Kuhva chíngtute'n police an ring tawh lo
Nimin zing dar 6:30 vel khan Kawrthah leh Rengdil inkarah kuhva phur truck lian pahnih leh an kuhva phurh ip 120 chu chhan hriat chian lohin a kâng. Hachhek biala kuhva chíngtute chuan dan loa kuhva lak luh man chungchangah police duty-te an rin zawh tawh loh thu an sawi.
Kawrthah aṭanga Vanglaini thu dawn danin, kuhva chíngtute chuan July 5, Nilaini zan khan Zamuang kaltlang tur kuhva phur lirthei a kal tih an hria a, Zamuang police checkgate a paltlang leh paltlang loh ngaichângin checkgate enthlatu an insiam a ni. Endik mumal awm loa kuhva phur truck chu an kaltlang avangin kuhva chíngtute chuan an ûm zui a, Zamuang aṭanga km. 3 velah nangchingin an man.
Kuhva chíngtute chuan kuhva phurtu truck-te chu Kawrthah lamah an hruai lêt a, zing dar 6:30 velah Kawrthah leh Rengdil inkarah a kâng. Truck khalhtu leh neitu nia an hriat chu Lalramthara s/o Lalnunsanga, Maubawk leh C Lalbiaktluanga s/o C Lalrinawma, Falkland Veng, Aizawlte an ni.
Hachhek Bial Kuhva Chingtu Pawl (HBKCP) hruaitute chuan, Zamuang Police checkgate-a duty ṭhinte chu kuhva chíngtute'n an rin zawh loh avangin a rûkin duty an indah thu an sawi a, "Mipui hmakhua ngaihtuah loa mahni hmasial, mipui tana rintlak loh police an lo awm hi a ná kan ti. Police fel tak tak kara hetiang lo tlazep hian police a tihmingchhia a, police-te lakah mipuiin rinna an hloh phah a ni," an ti.
Kawrthah SDPO Rozarliana Hmar chuan thuthar thehdarhtute zawhna chhangin, kuhva phur truck-te chu an tlân chak lutuk avanga an tihdin zawh loh thu Zamuang Police checkgate-a duty police-te'n an hrilh tih a sawi a, "HBKCP hruaitute nen pawh kan inbia a, dan anga thil kaltir tura ruahmanna an siam laiin kuhva phur motor pahnih a kâng tih kan hria a ni. Thil thlen dan report kimchang hi Mamit SP-ah kan thawn tawh," a ti a, FIR thehlut an la awm loh thu a sawi.
Hetih lai hian, HBKCP chuan police checkgate-a duty-te'n kuhva phur lirtheite an tlân chak lutuk nia an sawi chu dâwt chiang tak a nih thu an sawi a; police checkgate bula enthlatu (duty) an dahte'n thil thlen dan an hmuh chian thu an sawi bawk.