Ruihhlo dopui turin CM-in MHIP a sáwm

Chief minister Zoramthanga chuan, zu leh ruih theih thil hrang hrang, zûk leh hmuam lakahte fihlima dopui turin MHIP member-te a sáwm.

CM Zoramthanga hian nimina Zemabawk North leh Ṭhuampuia MHIP Day a hmanpuinaah thu sawiin, "Tunlai khawtlang nunah chhung tin deuh thaw tibuaitu zu leh ruihhlo do kawngah theihtawpin sorkar leh khawtlang, tlawmngai pawlte leh kohhran ang zawngtein ṭan kan la nasa. Do hneh dan awlsam ber chu heng thil mamawhna a awm loh a ni a, chhungkua ṭheuhah bul ṭan a pawimawh," a ti.

MHIP chu MUP leh YMA nen Mizoramin tlawmngai pawl lian a neih, ramin a vanneihpuite a nih thu sawiin Zoramthanga chuan, "Kan tlawmngai pawlte anga khawtlang suih khawm a, khawtlang hma ngai a, khawtlang tana thawk hi phai lamah leh ram dangah pawh hmuh tur a vàn viau ka ring," a ti a; sorkar hmalakna tam tak chu amah lâwnga hmalak ai chuan tlawmngai pawlte kaltlanga hmalak a nih avanga hlawhtling ta zawk, state dang tan pawha entawn tlak a nih thu a sawi.

Chief Minister chuan, MHIP member-te chu in chhung enkawltu pawimawh an nih avangin khawtlang nunah an pawimawh tih sawiin, "Chhung­kaw nun ṭha chuan society ṭha a hring a, chu chuan ram nuam a hring leh chhâwng ṭhin. Chhungkaw inrêlbàwlnaah mipa an pawimawh ang bawkin nu an pawimawh tak zet," a ti a; remna leh muanna Mizoramin a neih chu vawnhim tum tlat a ṭul thu a sawi bawk.

CM Zoramthanga hian MHIP Day pualin a bial chhunga MHIP branch hrang hrang hnenah lawmpuina pawisa a pe a ni.