PAHOSS dawng tura thlan zingah sum la dawng kim lo an tam

Mizoram sorkarin Aizawla traffic jam tih­ziaawmna tura a duan, Parking House Support Scheme (PAHOSS) hnuaia ṭanpuina sum dawng tura thlan tawh zingah pawisa la dawng lo leh an dawn tur zat la dawng lo eng emaw zat an awm.

Vanglaini thu dawn danin, PAHOSS dawng tura thlan, pawisa la pek loh an awm chhan leh pek kim loh tam tak an awm chhan chu PAHOSS sum tur K Deposit-a dah vang a ni. Hriat theih chinah PAHOSS sum hi K Deposit-ah cheng nuai 4,987 dah a ni a, tun hnaiah PAHOSS dawng tura thlan thar an awm tawh lo.

PAHOSS nodal de­partment UDPA chuan PAHOSS dilna 1,456 an dawng tawh a, ṭanpuina dawng turin mi 403 thlan a ni tawh. Mi 11-in in an sa zo tawh a, third/final instalment sum pawh pek an ni tawh. Hetih lai hian, ṭanpuina pek tura thlan tawh zinga mi 26 chu an inhnûkdâwk thung.

PAHOSS sum hi instal­ment thuma pek tur a ni a, a hmasa berah ṭanpuina pek tur zat aṭanga 40%, vawi hnihna leh vawi thumnaah 30% ve ve pek tura tih a ni.

Mi 140 hnenah first instal­ment cheng nuai 890 pek a ni a, mi 47 hnen­ah second instalment cheng nuai 200.60 pek tawh niin, mi 11 hnenah final instal­ment cheng nuai 34.20 pek tawh a ni. Ṭan­puina dawng tura thlan zingah sum la dawng lo hrim hrim mi 205 an awm.