Minister-te'n MHIP Day an hmanpui

Mizoram sorkara minister ṭhenkhat chuan nimin khan hmun hrang hrangah MHIP Day lawmna an hmanpui a; deputy chief minister Tawnluia chuan Khawzawl Arro Veng Branch MHIP silver jubilee lawmna leh MHIP Day lawmna Arro Veng YMA Hall-ah a hmanpui a, silver jubilee lungphun a hawng.

Tawnluia chuan, khawvel nuam siam turin mahni hmasial lo a, mi dang ṭanpui duhna thinlung nei tur leh chhungkuaa inzirtirna ṭha nei turin MHIP member-te a chah a; rinawmna leh takna nena mi dangte rawngbawl kawnga ṭan la tur leh Mizo hnam ziaráng, ṭawng, incheina leh nunphung ṭhate chawi sáng zel turin fuih bawk.

Minister Dr R Lalthangliana'n Sialhawk Branch MHIP-in Sialhawk community hall-a MHIP Day an lawmna a hmanpui a, "Nu ṭhain fa ṭha a hring ṭhin. Zirna lama sàntir ringawt ni lo, khua leh tui ṭha, ram leh hnam hmangaih, ruihhlo laka fihlim hring turin nute ka fuih thar duh. Kan neih hlu ber kan fate kan hloh si chuan sum deh chhuah tam leh hausakin awmzia a nei lo ang," a ti a; Sialhawk khuain kumina sawhthing aṭanga cheng nuai 370 an la lut thei chu ropui a tih thu a sawi. Dr Thangtea hian MHIP Day lawmpui nan Sialhawk MHIP hnenah Rs 30,000 a pe a ni.

Minister C Lalrinsanga chuan MHIP, Lunglei Venglai Branch-in Lunglei Convention Centre-a MHIP Day an lawmna a hmanpui a, "Kan ram leh hnam hmasawnna tur leh a chhe laite siamṭhatu chu MHIP-te an ni. Pathian thu keng nung turin nute an pawimawh," a ti a; ṭhalaite zingah ram leh hnam hmangaih nacháng hre lo an tam avangin zirtir an ngaih thu a sawi.

Minister Lalruatkima'n a bial chhunga veng pathum - Kanan Veng, Tuikual South leh Dintharahte MHIP Day lawmna a hmanpui a; fa neih tam inzirtir thar a ṭula a hriat thu a sawi a, "Faina leh social media hman thiam lamah pawh ṭan lak a pawimawh tak zet," a ti. Minister hian MHIP, Kanan Veng Branch hnenah Day lawmnaa ei leh in senso atan Rs 20,000 leh MHIP Rûn sak zawm nan MLA fund aṭangin Rs 2,00,000 a pe a; Tuikual South Branch hnenah Rs 20,000 leh MHIP Rûn sak nan MLA fund aṭangin Rs 3,00,000 a pe bawk.

Minister Lalrinawma chuan a bial chhunga MHIP, Tlungvel Venghlun Branch-in Venghlun YMA Hall-a MHIP Day an lawmna a hmanpui a; Mizo hmeichhiate'n an ngaihsan leh ngaihhlutte'n nasa takin nghawng a nei tih sawiin, "Ngaihsan tur dik kan ngaihsan a pawimawh hle. Zirna hmasa ber chu chhungkua a ni a, chhungkua enkawlnaa mawhphurtu pawimawh ber chu nute an ni. Nute hi ram tana mi ṭangkai min petu, khawtlang leh kohhran tana mi hlu tak tak min petute an ni," a ti.