MZU-ah graduate thar mi 5,201 an awm

Mizoram University chuan nimin chawhma dar 10 khan under graduate result a tichhuak a, final year (sixth semester)-ah pass percentage 76.86% a ni a, graduate thar mi 5,201 an awm. A pumpuiah B.Sc-a mi Jeffery Vanlaltlana, PUC, cumulative grade point average (CGPA) 9.56 hmutu chuan mark/point a hmu sang ber.

MZU hian 6th semester bakah 2nd semester leh 4th semester result a tichhuak a; 6th semester-ah zirlai exam 6,767 zinga mi 5,201 (76.86%) an pass. Pass zinga mi 4,969 chu regular student an ni a, mi 232 chu repeater an ni thung. Regular student-ah pass percentage 77.99 a nih laiin, repeater-ah chuan 58.59 a ni thung.

BA-ah zirlai exam 5,695 zinga 4,308 (75.65%) an pass a, B.Sc-ah exam mi 631 zinga 504 (79.87%), B.Com-ah exam mi 405 zinga 365 (90.12%) leh B.Sc Home Science-ah exam mi 36 zinga 24 (66.67%) an pass.

Stream tina ti ṭha ber gold medalist-te chu BA-ah Lalduhsaki (History), PUC a ni a, BSc-ah Jeffery Vanlaltlana (Biotechnology), PUC a ni. B.Com-ah C Lalnunhlimi, J Buana College, Lunglei a ni a, B.Sc (Home Science)-ah Saipari, Zirtiri Residential Science College a ni.

Second semester-ah exam beitu zirlai 5,252 zinga 3,153 (60.03%) an pass a; fourth semester-ah zirlai exam mi 6,503 zinga zirlai 4,410 (67.81%) an pass bawk.

Mizoram University hnuaiah under graduate zirna college 29 a awm mek a, chu'ngah chuan zirlai 18,714 an awm mek tih MZU thuchhuah chuan a tarlang.

MZU controller of examinations Prof Lalnuntluanga chuan, graduate tharte a lawmpui thu a sawi rualin, hlawhtling ve rih lote chu an fail-na paper-ah inbuatsaihna ṭha zawk nena exam leh turin a chah. UG result hma taka chhuah a nih theihna tura ṭhahnemngai taka thawktute inpekna leh thawhrimna fakawm a tih thu a sawi bawk.