MNF-in sorkarna kan chang leh ngei dawn tih a lang chiang - Vanlalzawma

Mizo National Youth Front (MNYF) Headquarters chuan nimin khan MNYF hruaitute pualin Falkawna Mayflower Park-ah political training an buatsaih a, thu sawitu MNF vice president Vanlalzawma chuan, Mizoram politics vir vel thlirin, MNF party-in sorkarna an chang leh ngei dawn tih a lang chiang zel niin a sawi.

Vanlalzawma chuan, "Mizoram politics vir vel han thlir hian MNF hian sorkarna a chang leh ngei dawn tih a lang chiang chho zel a, Mizoram hmun tin maia MNF hmasawnna hi a lawmawm tak zet," a ti a; MNF chu Mizo ṭhalaite ta leh ṭhalaite din a nih thu sawiin, "Mizoramin inthlanpui kan hmachhawn turah ṭhalaite avangin hnehna chan ngei kan inbeisei," a ti.

MNF treasurer K Vanlalauva chuan, ṭhalaite chu Mizo nationalism vawng nung theitu an nih thu sawiin, "Hnam innghahna in ni. Hruaitute hi kan thutiamah kan din nghet tur a ni a, kan sawi loh anga kal hi politics-ah a pawi em em," a ti a, sawi loh anga kal chu ZPM leader Lalduhoma laka mipuiin rinna an nghah theih loh chhan niin a sawi.

Thusawitu dang MNF adviser Lalchhandama Ralte chuan, MNF chu Mizo hnam tana din a nih thu sawiin, "Zo fate rorelna pakhat hnuaia kan awm theihna tura din a ni. MNF hi party zawng zawngah hruaitu nei ṭha ber kan ni a, kan hruaitute hian MNF an zawm aṭangin party dangah vawi khat mah an la pakâi ngai lo," a ti.

Inkhawm kaihruaitu MNYF vice president Zodinpuia chuan, Assembly Secretariat-a hna lak chungchangah ZPM chu thil awmzia hre lo leh rem leh rem loa MNF leh Mizoram sorkar kâwk nghal ngawtah a puh a, "Assembly Secretariat hnuaia thawktu lak danah MNF sorkarin inrawlhna leh mawhphurhna a nei lo," a ti a; MNF sorkar hnuaia MPSC leh MSSSC-in hna lakna tam tak a kalpui tawhah sawisel tur a awm ngai lo niin a sawi bawk.